अंबरनाथ, ता. २६ (वार्ताहर) : आईसोबत पत्नीला घ्यायला गावाला जाणे ३७ वर्षीय तरुणाला चांगलेच महागात पडले आहे. चोरट्यांनी घरफोडी करून सोन्याचे दागिने आणि टीव्ही अशी ७३ हजारांची चोरी करून पसार झाले. यासंदर्भात अंबरनाथ येथील शिवाजीनगर पोलिस ठाण्यात गुन्हा दाखल झाला आहे.
अंबरनाथ पूर्वेच्या लोकनगरी परिसरात तिरुपती बालाजी सोसायटीमध्ये कपिल अण्णा मागाडे हा ३७ वर्षीय तरुण आपल्या कुटुंबासह राहतो. तो १८ तारखेला आपल्या मूळ गावी सातारा येथे आईसोबत पत्नीला घेण्यासाठी गेला होता. याच संधीचा फायदा घेऊन त्यांच्या घराचा दरवाजा तोडून १० हजारांचा टीव्ही, सोन्याचे दागिने यामध्ये ३६ हजारांचे कानातले, १२ हजारांच्या दोन अंगठ्या, तसेच १५ हजारांची रोकड असा सुमारे ७३ हजारांचे दागिने घेऊन चोरटे फरार झाले आहेत. याची माहिती मागाडे यांना गावावरून आल्यानंतर मिळाली. त्यांनी या संदर्भात शिवाजीनगर पोलिस ठाण्यात धाव घेऊन तक्रार नोंदवली. पोलिसांनी याप्रकरणी गुन्हा दाखल केला असून पोलिस उपनिरीक्षक रवींद्र भवारी याचा अधिक तपास करत आहेत.