सहकारमंत्र्यांची आरडीसीसी बँकेला भेट
अलिबाग, ता. २६ : नुकतीच रायगड जिल्हा मध्यवर्ती सहकारी बँकेच्या मुख्य कार्यालयाला राज्याचे सहकारमंत्री बाबासाहेब पाटील यांनी भेट दिली. या वेळी त्यांनी बँकेचे अध्यक्ष जयंत पाटील यांचे दूरदृष्टीपूर्ण नेतृत्वाचे कौतुक केले. या वेळी व्यासपीठावर बँकेचे अध्यक्ष जयंत पाटील, उपाध्यक्ष सुरेश खैरे, जिल्हा उपनिबंधक प्रमोद जगताप, बँकेचे मुख्य कार्यकारी अधिकारी मंदार वर्तक, माजी मुख्य कार्यकारी अधिकारी प्रदीप नाईक, तसेच बँकेचे सर्व संचालक व सहकार विभागाचे आणि बँकेचे अधिकारी उपस्थित होते. आपल्या भाषणात सहकारमंत्री यांनी सांगितले की, आरबीआय, नाबार्ड, राज्य शासन यांच्या वतीने करण्यात येणारा प्रत्येक उपक्रम आरडीसीसी बँकेने यशस्वी करून दाखविला आहे, त्याकरिता बँकेचे धोरण आणि एकत्रित कार्यपद्धतीचा प्रभाव अधिक उल्लेखनीय आहे, असे नमूद करताना बँकेचे अध्यक्ष जयंत पाटील आणि सर्व संचालकांचे कौतुक केले. बँकेतील शिस्त, स्वच्छता आणि नेतृत्वाची प्रामाणिकता पाहून त्यांनी समाधान व्यक्त केले. बँकेने देशात मिळवलेली ओळख आणि अध्यक्ष जयंत पाटील यांनी केलेले नेतृत्व कार्य हे आगामी अनेक पिढ्यांसाठी मार्गदर्शक ठरणार असल्याचे त्‍यांनी सांगितले. या कार्यक्रमात बँकेचे अध्यक्ष जयंत पाटील यांनी आपल्या भाषणात लातूर येथून सहकारमंत्री यांचा प्रवास व त्यांच्या कार्यपद्धतीचा गौरव केला. तसेच राज्यातील सर्व सहकारी बँकांच्या भविष्यातील योजनांकडे शासनाने अधिक गंभीरतेने पाहावे, अशी अपेक्षा व्यक्त केली.