भिवंडी, ता. २८ (वार्ताहर)ः राज्यात भाजप मोठा भाऊ असला तरी ठाणे जिल्हा शिवसेनेचा बालेकिल्ला आहे. त्यामुळे शिवसेना हाच मोठा भाऊ असल्याचे प्रतिपादन फलोत्पादन व रोजगार हमीमंत्री भरत गोगावले यांनी केले. वडपे येथील एका कार्यक्रमात बोलत होते. प्रत्येकाला आपला पक्ष वाढविण्याचा अधिकारी आहे; पण ठाणे जिल्ह्यात ताकद कोणाची आहे, हे सर्वश्रुत आहे. त्यामुळे आमचे नेते जो काही निर्णय घेतील, तो आम्हाला मान्य असणार आहे, असे भरत गोगावले यांनी स्पष्ट केले. तर भिवंडी तालुक्यातील सर्व रस्त्यांवर सुरू असलेल्या आंदोलनाबाबत विचारले असता राजकारण कधी कुठे वळण घेईल, हे सांगत येत नाही. या वेळी भिवंडी क्षेत्रामध्ये फक्त शिवसेनेचा आवाज आहे. त्यामुळे येथील स्थानिक स्वराज्य संस्थांच्या निवडणुकीत भगवा फडकवण्याचे आवाहन कार्यकर्त्यांना केले. तर मतदार नावनोंदणीवर भर देणाऱ्या शिवसैनिकांनाच उमेदवारी देणार असल्याचे प्रतिपादन मंत्री उदय सामंत यांनी केले.
-----------------------------------------
...तर रस्त्यावर उतरू
हिंदी भाषा अनिवार्य झालेली नाही. हिंदी सक्तीबाबत अभ्यास करणाऱ्या डॉ. माशेलकर यांच्या समितीचा दिलेला अहवाल तत्कालीन मुख्यमंत्री उद्धव ठाकरे यांनी स्वीकारला होता. मराठी भाषेवर अन्याय झाला तर रस्त्यावर उतरून आंदोलन करू, असे सामंत म्हणाले.