टोकावडे, ता. २८ (बातमीदार)ः राज्यातील कृषी क्षेत्रात डिजिटल सेवांचा वापर करून शासनाच्या विविध योजनांचा जलद गतीने व परिणामकारकरीत्या लाभ शेतकऱ्यांना देणे सुलभ व्हावे, याकरिता केंद्र शासनाची ॲग्रीस्टॅक योजना राज्यात राबविण्यात येत आहे. या योजनेअंतर्गत मुरबाड तालुक्यातील १४,८३५ शेतकऱ्यांनी फार्मर आयडी बनवून घेतलेला आहे.
मुरबाड तालुक्यातील ३०,७०५ शेतकऱ्याची नोंदणी बाकी आहे. त्यामुळे शेतकऱ्यांना विशेषतः अजूनही ॲग्रीस्टॅकमध्ये नोंदणी केलेल्या सर्व शेतकऱ्यांनी गावातील सहाय्यक कृषी अधिकारी व ग्राम महसूल अधिकारी यांची मदत घेऊन नागरी सुविधा केंद्रावर जाऊन फार्मर आयडीसाठी नोंदणी करूम योजनेत सहभाग घ्यावा, असे आवाहन मुरबाड तालुका कृषी विभागप्रमुख नामदेव धांडे यांनी केले आहे.