नवी मुंबई, ता. २८ (वार्ताहर) : वंचित बहुजन आघाडीच्या नवी मुंबई जिल्हाध्यक्षपदी अश्वजित अशोक जगताप यांची नियुक्ती करण्यात आली आहे. पक्षाचे राष्ट्रीय नेते ॲड. बाळासाहेब आंबेडकर यांच्या नेतृत्वाखाली, महाराष्ट्र प्रदेश अध्यक्षा रेखा ठाकूर, संपूर्ण प्रदेश कमिटी आणि महिला आघाडीच्या जिल्हाध्यक्षा शिल्पा रणदिवे यांच्या मार्गदर्शनाखाली ही नियुक्ती करण्यात आली. अश्वजित जगताप हे गेल्या अनेक वर्षांपासून नवी मुंबईतील आंबेडकरी चळवळीत सक्रिय आहेत. विशेषतः युवकांमध्ये संघटन बांधणी, सामाजिक प्रश्नांवर जनजागृती आणि भारतीय राज्यघटनेचे मूल्य जनतेपर्यंत पोहोचवण्यासाठी ते सातत्याने कार्यरत आहेत. पक्षश्रेष्ठींनी माझ्यावर दाखवलेला विश्वास हा माझ्यासाठी प्रेरणादायी आहे. वंचित बहुजन आघाडीचा झेंडा नवी मुंबईच्या प्रत्येक वस्तीपर्यंत पोहोचवण्यासाठी मी अहोरात्र कार्यरत राहीन. स्थानिक प्रश्नांवर लढा देत पक्ष संघटना बळकट करणे, हे माझे प्रमुख उद्दिष्ट राहील, असे अश्वजित जगताप यांनी स्पष्ट केले आहे.