पनवेल, ता. २८ (वार्ताहर) : पनवेल-जेएनपीए मार्गावरील पुष्पकनगर बायपास रस्त्यावर पिस्तूल व जिवंत काडतुसे घेऊन आलेल्या एका तरुणाला पनवेल शहर पोलिसांनी मंगळवारी (ता. २४) रात्री सापळा लावून अटक केली. आकाश संजय खंडागळे (२१) असे अटक केलेल्या तरुणाचे नाव असून पोलिसांनी त्याच्याजवळ असलेली एक काळ्या रंगाची मॅगझीनसह पिस्तूल जप्त केली आहे.
पनवेल-जेएनपीए मार्गावरील पुष्पकनगर बायपास रस्त्यावरील बिंदू ढाब्याजवळ एक व्यक्ती घातक शस्र घेऊन येणार असल्याची माहिती पनवेल शहर पोलिसांना मिळाली होती. त्यानुसार पनवेल शहर पोलिसांनी गेल्या मंगळवारी रात्री नऊच्या सुमारास पुष्पकनगर बायपास रस्त्यावर सापळा लावला होता. रात्री साडेनऊ वाजण्याच्या सुमारास आकाश खंडागळे त्या ठिकाणी संशयास्पदरीत्या आला असता, पोलिसांनी त्याला पकडून त्याची झडती घेतली. त्या वेळी त्याच्याजवळ एक पिस्तूल व मॅगझीन आढळून आले. त्यामुळे पोलिसांनी त्याच्याजवळ सापडलेले पिस्तूल जप्त करून त्याला अटक केली आहे.