कशेडी घाटात जुन्या मार्गावर रस्त्याला भेगा

तहसीलदारांकडून संबंधित अधिकाऱ्यांसह पाहणी

पोलादपूर, ता. २८ (बातमीदार) : मुंबई-गोवा महामार्गावरील कशेडी घाटात जुन्या महामार्गावर भोगाव हद्दीत रस्त्यावर भेगा पडल्या आहेत. पावसाळ्यात दरड कोसळून मोठी दुर्घटना घडण्याची शक्यता असल्‍याचे स्थानिकांनी तहसीलदार कपिल घोरपडे यांच्या लक्षात आणून दिले. त्‍यानंतर घोरपडे यांनी संबंधित अधिकाऱ्यांशी चर्चा करून घटनास्थळाची पाहणी केली आणि दोन दिवसांत दुरुस्ती करण्याबाबत सूचना दिल्‍या.
मुंबई-गोवा महामार्गावरील कशेडी घाटात बोगदामार्गे चौपदरीकरणाचे काम करण्यात आले. या वेळी भोगावच्या हद्दीत डोंगराचे उत्खनन करण्यात आले आहे. तसेच वाहतूक नवीन महामार्ग बोगदामार्गे वळविण्यात आली आहे. याच ठिकाणी भोगाव हद्दीत जुन्या मार्गावरील रस्त्याला पाच ते १० मीटर अंतरावर मोठ्या प्रमाणात भेगा पडल्‍या आहेत. त्‍यामुळे पावसाळ्यात रस्ता खचून तसेच नवीन महामार्गावर दरड कोसळण्याची भीती व्यक्‍त होत आहे. संबंधित महामार्ग प्रशासनाने वेळीच दखल घेत तत्काळ उपाययोजना करण्याची मागणी स्‍थानिकांकडून करण्यात येत आहे.
सद्य:स्थितीत कशेडी घाटातील वाहतूक बोगदामार्गे होत असल्याने जुन्या महामार्गावर तुरळक वाहतूक सुरू आहे. यामुळे वाहतुकीला कोणताही अडथळा नसला तरी भविष्यात किंवा पावसाळ्यात बोगदामार्गे काही अनुचित प्रकार घडल्यास पर्यायी मार्ग म्हणून कशेडी घाटातील जुन्या महामार्गावरून वाहतूक वळवावी लागणार आहे. यासाठी हा महामार्ग अतिशय महत्त्वाचा आहे. संबंधित बांधकाम विभागाने वेळीच दखल घेण्याची मागणी होत आहे.
२००५ मध्ये अतिवृष्टीत भोगाव हद्दीत खचलेल्या रस्त्‍याचे काम अपूर्ण असून, ते संथगतीने सुरू आहे. यामुळे या विभागातून प्रवास करणाऱ्या स्थानिक नागरिक आणि प्रवासी जनतेला मनस्ताप सहन करावा लागत आहे. येथील रस्त्याची तत्काळ दुरुस्ती करण्यात यावी, अशी मागणी स्थानिक नागरिक, ग्रामस्थांकडून केली जात आहे. या वेळी पळचील ग्रामपंचायतीचे माजी सरपंच उमेश मोरे, रवींद्र जाधव, प्रवीण मोरे, ग्रामस्थ आदी उपस्थित होते.

पोलादपूर ः कशेडी घाटाजवळ भोगाव रस्‍त्‍याला पडलेल्‍याचे भेगांची पाहणी करण्यात आली.