ठाण्यात ‘स्पेस एज्युकेशन लॅब’ची निर्मिती
‘इस्रो’च्या स्पेस ट्यूटर प्रोग्रामअंतर्गत प्रयोगशाळा
सकाळ वृत्तसेवा
ठाणे, ता. २८ : ठाण्यातील ‘अंबर इंटरनॅशनल स्कूल’ आणि ‘भारतीय अवकाश संशोधन संस्था’ अर्थात इस्रोच्या स्पेस ट्यूटर प्रोग्रामअंतर्गत व्योमिका स्पेस अकॅडमी यांच्यात शनिवारी (ता. २८) सामंजस्य करार करण्यात आला. या करारान्वये मुंबई महानगर क्षेत्रातील (एमएमआर) पहिली स्पेस एज्युकेशन लॅब ठाण्यातील ‘अंबर इंटरनॅशनल स्कूल’ येथे लक्ष्मण कदम यांच्या नेतृत्वाखाली उभारण्यात येणार आहे.
ठाण्यातील तसेच मुंबई महानगर क्षेत्रातील शालेय विद्यार्थ्यांना अंतराळ संशोधन क्षेत्राची कवाडे खुली करून देण्याच्या हेतूने शारदा एज्युकेशन सोसायटीच्या अंबर इंटरनॅशनल स्कूल येथे स्पेस एज्युकेशन लॅबची निर्मिती करण्यात येणार आहे. इस्रोच्या स्पेस ट्यूटर प्रोग्रामअंतर्गत उभारण्यात येणाऱ्या लॅब निर्मितीबाबत शनिवारी अंबर इंटरनॅशनल स्कूल आणि व्योमिका स्पेस अकॅडमी यांच्यात सामंजस्य करार करण्यात आला. या वेळी अंतराळ संशोधन क्षेत्राचे अभ्यासक डॉ. प्रतीक मुणगेकर, व्योमिका स्पेस अकॅडमीचे गोविंद यादव, शारदा एज्युकेशन सोसायटीचे सचिव डॉ. प्रदीप ढवळ, अंबर इंटरनॅशनल स्कूलचे संचालक लक्ष्मण कदम, शारदा एज्युकेशन सोसायटीचे अध्यक्ष विलास ठुसे, कल्पेश जाधव (प्रोग्रॅम आणि ॲडमिन हेड), दिलीप त्रिपाठी यांच्यासह दूरदृश्यप्रणालीद्वारे इस्रोचे वरिष्ठ शास्त्रज्ञ डॉ. टी. एन. सुरेशकुमार तसेच अंबर इंटरनॅशनल स्कूलमधील शिक्षक, शिक्षकेतर कर्मचारी, पालक, विद्यार्थी आणि अन्य मान्यवर उपस्थित होते. या वेळी इस्रोचे प्रख्यात शास्त्रज्ञ डॉ. टी. एन. सुरेशकुमार यांनी दूरदृश्यप्रणालीद्वारे उपस्थित राहून या सामंजस्य कराराबद्दल संबंधितांचे अभिनंदन करून प्रयोगशाळेच्या निर्मितीसाठी शुभेच्छा दिल्या. तसेच अशा प्रयोगशाळांमुळे भारताचे अंतराळ संशोधन क्षेत्रातील भविष्य उज्ज्वल होणार आहे. या प्रयोगशाळांमुळे विद्यार्थ्यांमध्ये सर्जनशीलता आणि विज्ञानाची आवड निर्माण होईल, असा विश्वास डॉ. टी. एन. सुरेशकुमार यांनी व्यक्त केला.