अनेक भागांत दूषित पाण्याचा पुरवठा
मुंबईकरांच्या आरोग्यावर परिणाम
सकाळ वृत्तसेवा
मुंबई, ता. २८ ः मुंबईच्या अनेक भागांत दूषित पाणीपुरवठा होत असून कमी दाबाने होत असलेल्या पाणीपुरवठ्यामुळे नागरिक हैराण आहेत. पाणीपुरवठ्याच्या शेवटच्या टोकाला असलेल्या वसाहतींना याचा नाहक त्रास सहन करावा लागत आहे.
बोरिवली येथील गोराई परिसरात कायमस्वरूपी कमी दाबाने, दूषित पाणीपुरवठा होत असल्याने नागरिकांच्या तक्रारी वाढल्या आहेत. दूषित पाणीपुरवठा होत असलेल्या नवीन जलवाहिन्या टाकण्यासाठी पालिका आयुक्तांची परवानगी वेळेत न मिळाल्‍याने येथील नागरिक त्रस्त आहेत. लोकप्रतिनिधींकडे तक्रारी करूनही या समस्‍येवर तोडगा निघत नसल्‍याचे स्‍थानिकांनी सांगितले.
चेंबूर, गोवंडी, बोरिवली, व्रिकोळी, कांदिवली, मालाड, कुर्ला या भागात कमी दाबाने पाणीपुरवठा होत आहे. अधूनमधून दूषित पाणी येत असल्याच्या नागरिकांच्या तक्रारी आहेत. त्यामुळे नागरिकांच्या आरोग्याला धोका निर्माण झाला आहे. पालिकेच्या विभाग कार्यालयात तक्रारी करूनही त्याची दखल घेतली जात असल्याचे नागरिकांचे म्हणणे आहे. सध्या पावसाळी रोगाचे प्रमाण वाढले असताना दूषित पाण्यामुळे आजारपण वाढू लागल्यास मोठी समस्या निर्माण होईल, अशी भीती व्यक्त होत आहे.

प्रश्न सोडवण्याची आयुक्तांकडे मागणी
ही समस्या सोडविण्याची मागणी आमदार संजय उपाध्याय यांनी पालिका आयुक्त भूषण गगराणी यांच्याकडे केली आहे. सध्या तलावातील जलसाठा वाढला असून पुरेशा दाबाने पाणीपुरवठा करा. दूषित पाणीपुरवठ्यावर उपाययोजना करा, या मागण्याही उपाध्याय यांनी केल्या आहेत.