पनवेल, ता. २९ (वार्ताहर) : पोलिस असल्याची बतावणी करून, तसेच बोलण्यात गुंतवून भामट्यांनी मागील दोन दिवसांत पनवेल आणि कामोठे भागातील एका महिलेसह तिघांना लुटले. त्यांच्याजवळचे सुमारे तीन लाखांचे दागिने लुबाडून चोरटे पसार झाले. या भामट्यांविरोधात पनवेल आणि कामोठे पोलिसांनी गुन्हे दाखल करून त्यांचा शोध सुरू केला आहे.
पनवेलमधील प्रभाकर म्हात्रे (६६) हे २५ जूनला चिकन घेऊन आपल्या घरी जात होते. दरम्यान, घोडके हॉस्पिटलजवळ पोलिसाचा गणवेश घालून दुचाकीवरून आलेल्या दोघा तोतया पोलिसांनी म्हात्रे यांना अडवले. त्यानंतर दोघा भामट्यांनी त्यांच्या हातातील ५० हजाराची सोन्याची अंगठी व २५ हजाराची सोनसाखळी काढून घेतली. त्यामुळे म्हात्रे यांनी आरडाओरड केल्यानंतर दोघा तोतया पोलिसांनी पलायन केले. त्यानंतर त्यांनी पनवेल शहर पोलिस ठाण्यात तक्रार दाखल केली. त्याच दिवशी कामोठे सेक्टर १८मध्ये घडलेल्या दुसऱ्या घटनेत पंढरीनाथ कासविद (७५) हे सकाळी फेरफटका मारण्यासाठी बाहेर पडले होते. त्यांना देखील दोघा भामट्यांनी पोलिस असल्याचे भासवले. त्यानंतर त्यांनी तपासणी करण्याच्या बहाण्याने कासविद यांच्या गळ्यातील सोनसाखळी व अंगठी काढून घेतली. त्यानंतर भामट्यांनी त्यांचे दागिने त्यांच्या खिशात ठेवण्याचा बहाणा करून त्यांचे एक लाख ६८ हजारांचे दागिने चोरले. त्यानंतर त्यांनी पलायन केले. त्यानंतर कासविद यांनी आपला खिसा तपासला असता, खिशामध्ये दागिने नसल्याचे त्यांच्या निदर्शनास आले. त्यांनतर त्यांनी कामोठे पोलिस ठाण्यात तक्रार दाखल केली.
--------------------
मोफत रेशन वाटण्याचा बहाणा
कामोठे सेक्टर ३४मध्ये २४ जूनला सायंकाळी पाच वाजण्याच्या सुमारास घडलेल्या तिसऱ्या घटनेत दोघा भामट्यांनी त्यांच्या शेठला मुलगा झाल्याने ते मोफत रेशन वाटत असल्याचे सांगून विमल दौलत चिकणे (५८) यांना आपल्या सोबत नेले. त्यानंतर त्यांना अंगावरील सर्व दागिने काढून ठेवण्यास सांगितल्याने विमल चिकणे यांनी ९० हजारांचे मंगळसूत्र आणि कर्णफुले काढून कापडी पिशवीमध्ये ठेवले. त्यानंतर भामट्यांनी चिकणे यांना बोलण्यात गुंतवून त्यांच्याजवळ असलेली दागिन्यांची पिशवी आपल्याकडे घेऊन त्यांनी पलायन केले. त्यानंतर विमल यांनी कामोठे पोलिस ठाण्यात तक्रार दाखल केली.