जिल्ह्यात शाळाबाह्य मुलांची शोधमोहीम
१ ते १५ जुलैपर्यंत विविध ठिकाणी देणार भेटी
अलिबाग, ता. २९ (वार्ताहर)ः रायगड जिल्ह्यातील तीन ते १८ वयोगटातील शाळाबाह्य, अनियमित आणि स्थलांतरित मुलांना शिक्षणाच्या प्रवाहात आणण्यासाठी शिक्षण विभागाकडून शाळाबाह्य मुलांची विशेष शोधमोहीम १ जुलैपासून हाती घेण्यात येणार आहे. ही मोहीम १५ जुलैपर्यंत राबविली जाणार आहे. मोहिमेंतर्गत शाळाबाह्य विद्यार्थ्‍यांचा शोध घेऊन त्यांना शिक्षणाच्या प्रवाहात आणण्याच्या उद्दिष्टांची माहिती जिल्हा परिषदेच्या मुख्य कार्यकारी अधिकारी नेहा भोसले व प्राथमिक शिक्षणाधिकारी पुनिता गुरव यांनी दिली.
रायगड जिल्ह्यात प्राथमिक समग्र शिक्षा कार्यक्रमाची तसेच प्रगत शैक्षणिक महाराष्ट्रअंतर्गत ज्ञानरचनावादी शाळा, कृतीयुक्त अध्ययन पद्धती, डिजिटल शाळा, आयएसओ मानांकन, मोफत पाठ्यपुस्तक, गणवेश, मध्यान्ह भोजन, विविध शिष्यवृत्ती परीक्षांची तयारी, नवोदय परीक्षा तयारी अशा प्रभावी उपक्रमांची अंमलबजावणी अनुभवी व तज्‍ज्ञ शिक्षकांमार्फत शाळांमध्ये सुरू आहे; मात्र सरकारच्या अनेक योजना सुरू असतानाही अद्याप काही बालके शाळाबाह्य असल्याचे निदर्शनास येत आहेत. अशा बालकांना शिक्षणाच्या प्रवाहात आणण्यासाठी शाळाबाह्य मुलांचा शोध घेऊन त्या मुलांना शिक्षणाच्या प्रवाहात आणण्याकरिता शोधमोहीम राबविण्यात येणार आहे.
मोहिमेत घरोघरी जाऊन शाळाबाह्य मुलांचे सर्वेक्षण करण्याव्यतिरिक्त बसस्थानक, रेल्वेस्थानक, बाजारपेठ, वीटभट्ट्या, दगडखाणी, साखर कारखाने, स्थलांतरित कुटुंबे, जिल्ह्यातील सर्व खेडी, गाव, वाडी, तांडे, पाडे, शेतमळे, जंगल, बालगृह, निरीक्षणगृह, विशेष दत्तक संस्था आदी ठिकाणी जाऊन शाळाबाह्य विद्यार्थ्यांच्या नोंदी करण्याबाबत स्पष्ट करण्यात आले आहे.
शाळाबाह्य मुलांच्या विशेष शोध मोहिमेंतर्गत सहा ते १८ वर्षे वयोगटातील शाळाबाह्य बालकांचा शोध घेण्यात येणार आहे. या कालावधीत नागरिकांनी सहकार्य करावे, असे आवाहन जिल्हा परिषदेच्या मुख्य कार्यकारी अधिकारी नेहा भोसले व प्राथमिक शिक्षण अधिकारी पुनिता गुरव यांनी केले आहे.

................