वाणगाव, ता. २९ (बातमीदार)ः पालघर जिल्ह्यातील भातशेती पावसाच्या पाण्यावर अवलंबून आहे. अशातच गतवर्षी निसर्गामध्ये सातत्याने होत असलेल्या बदलांमुळे आर्थिक संकटाचा सामना शेतकऱ्यांना करावा लागला होता, पण यंदा पावसाने लवकर हजेरी लावली असल्याने शेतकऱ्यांनी पेरणीचा मुहूर्त लवकर साधल्याने उगवलेल्या भातांच्या रोपांमुळे ‘धरणी मातेच्या पोटातून हिरवे सोने’ उगवल्याचा भास होत आहे.
पारंपरिक भातशेतीला आदिवासी समाजात देव मानतात. त्यामुळे परंपरागत चालत आलेली प्रथा टिकून राहावी, यासाठी जिल्ह्यात पारंपरिक पद्धतीने भातपेरणी केली जाते. काही भागात पारंपरिक शेतीबरोबरच आधुनिक पद्धतीने ट्रे रोपवाटिका तयार करण्यात आल्या आहेत. यांत्रिकीकरणाने भातशेतीचे क्षेत्र वाढावे, यासाठी कृषी विभाग आणि कृषी विज्ञान केंद्राचे शास्त्रज्ञ प्रात्यक्षिकाद्वारे मार्गदर्शन करत आहेत. यंदा वेळेवर पेरणी आणि पावसाचे सातत्य असल्याने भातासाठी अतिशय पोषक वातावरण आहे. त्यामुळे जिल्ह्यातील भात उत्पादक शेतकरी सुखावला आहे.
----------------------------------
उगवण क्षमता चांगली
जिल्ह्यातील बहुतेक शेतकऱ्यांनी १६ जूनच्या आसपास पेरणी केली आहे. साधारणतः १५ दिवसांची रोपे झाली आहेत. पुढील १० ते १५ दिवसांत रोपे लागवडीयोग्य होतील. यंदा भात बियाण्यांची उगवण क्षमता चांगली झाली असून, जिल्ह्यातील शेतकरी आंतरमशागतीच्या कामांना लागला आहे.
------------------------------
त्रिसूत्रीचा वापर फायदेशीर
यंदा जिल्ह्यातील शेतकऱ्यांनी वेळेवर पेरणी केली आहे. पुढील काळात पावसाचे सातत्य राहिल्यास वेळेवर लावणी तसेच परतीच्या पावसाने नुकसान कमी केल्यास वेळेवर कापणी होईल. उत्पादनवाढीसाठी वेळेवर ‘पेरणी, लावणी आणि कापणी’ या त्रिसूत्रीचा वापर केल्यास उत्पादनामध्ये भर पडते.