नेवाळी नाक्यावर वाहनांच्या रांगा
तीन तास वाहतूक कोंडीमुळे चालक त्रस्त
अंबरनाथ ता. २९ (वार्ताहर) : तालुक्यातील नेवाळी नाका हा गेल्या काही वर्षांपासून वाहतूक कोंडीचे केंद्र ठरत आहे. अपुरा चौक, अरुंद होणाऱ्या मार्गिका याचबरोबर अंबरनाथहून मुंबई, ठाणे नवी मुंबईच्या दिशेने ये-जा करणारी वाहने आणि कल्याणहून मलंगगडाच्या दिशेने वाहतूक करणारी अवजड वाहने एकाच ठिकाणी येत असल्याने कोंडी होते. तसेच बेशिस्त चालक आणि रस्त्याच्या कडेला उभ्या असलेल्या वाहनांमुळे कोंडीत अधिकच भर पडते. दरम्यान, शनिवार, रविवार हे दोन दिवस सुट्टीचे असल्याने मार्गावर अभुतपूर्वक कोंडी होत आहे.

अंबरनाथ कटाई राज्य मार्गावर शनिवारी (ता. २८) वेगवेगळ्या ठिकाणी अभूतपूर्व कोंडी झाली होती. कटाईपासून कोळेगाव, कोणी फाटा, नेवाली नाका आणि अंबरनाथ शहराच्या प्रवेशद्वारावर मोठी वाहतूक कोंडी होत असल्याने चालकांना नाहक त्रास सहन करावा लागला. यात नेवाळी नाक्यावर बेशिस्त चालक आणि वाहनांच्या मोठ्या रांगांमुळे वाहतूक पोलिस हातबल झाले होते.

विविध ठिकाणी पडलेले खड्डे, अपूर्ण रस्ते, जोड रस्त्यांची सुरू असलेली कामे यामुळे कोंडी होत आहे. त्यात बदलापूर, अंबरनाथ शहरातील प्रवाशांना ठाणे, मुंबई, नवी मुंबई, डोंबिवली या शहरांना जोडण्यासाठी महत्त्वाचा असलेला कटाई, अंबरनाथ राज्य मार्ग कोंडीत सापडत आहे. कोळेगाव चौकात अनेक अतिक्रमणे झाली आहेत, तसेच वाहने रस्त्याच्या कडेला उभी केल्याने चालकांना नाहक त्रास सहन करावा लागत आहे.