मुरबाड, ता. २९ (बातमीदार)ः गेल्या पाच वर्षांतील विविध उपक्रमांमुळे शासनाच्या ‘दिशा’ योजनेत २०२४-२५ तील सर्वोत्कृष्ट शाळा म्हणून देवगाव येथील जिल्हा परिषद शाळेची निवड करण्यात आली आहे. नुकत्याच झालेल्या एका कार्यक्रमात शाळेला प्रमाणपत्र बहाल करण्यात आले आहे.
या शाळेत सेमी इंग्रजी माध्यमातूनसुद्धा शिक्षण दिले जात आहे. शाळेच्या परिसरात पाच इंग्रजी माध्यमाच्या शाळा असून, मराठी शाळेची पटसंख्या २४५ पर्यंत पोहोचली आहे. पालक, शिक्षक, शाळा व्यवस्थापन समिती व ग्रापंचायतीच्या योगदानातून शाळेने हे यश मिळवल्याचे शिक्षक सांगतात. तंबाखूमुक्त शाळा स्पर्धेत सहभागी या शाळेचा विशेष गौरव झाला आहे. तसेच जिल्हास्तरीय नाट्यस्पर्धा, स्काऊट गाईडच्या विविध स्पर्धेत प्रथम क्रमांक पटकावला आहे. त्याचबरोबर शासनाच्या निवडणूक प्रचार, प्रौढ शिक्षण, स्वच्छता अभियानात योगदान आहे. तसेच डिजिटल माध्यमात इयत्ता पाचवीचे विद्यार्थी तालुक्यात प्रथम रँकमध्ये आले आहेत. स्कॉलरशिप तसेच मंथनसारख्या स्पर्धा परीक्षेत विद्यार्थ्यांनी विशेष प्रावीण्य मिळवले आहे. त्यामुळे मुख्याध्यापक दीपश्री ईसामे, शिक्षक डॉ. निळकंठ व्यापारी, एकनाथ देसले, नितीन घागस, नंदिनी सरनोबत, पौर्णिमा भोईर, प्रतिमा नागरगोजे यांचे कौतुक होत आहे.