विरार, ता. २९ (बातमीदार)ः वसई-विरार महापालिका मुख्यालयाशेजारील उभारलेला पुतळा गायब झाल्याने विविध तर्क-वितर्क काढण्यात येत होते. अशातच महापालिकेने शहरातील पुतळे डागडुजीसाठी काढल्याचे कारण दिले आहे. त्यामुळे सुशोभीकरणाचे काम वादात सापडण्याची शक्यता आहे.
वसई-विरार शहर पालिकेतर्फे काही महिन्यांपूर्वी पालिका क्षेत्रात सुशोभीकरण करण्यात आले होते. कित्येक ठिकाणी विविध व्यक्ती, पशु-पक्षी यांचे पुतळे उभारण्यात आले आहेत; मात्र त्याची देखभाल करण्यात पालिका असमर्थ ठरली आहे. पालिका मुख्य कार्यालयाच्या हाकेच्या अंतरावर असलेले पुतळे तीन-चार दिवसांपूर्वी गायब झाले आहेत. याबाबत पालिका प्रशासनाशी संपर्क केला असता डागडुजीसाठी पुतळे काढल्याचे सांगण्यात आले; पण दोन वर्षांपूर्वी लावलेले पुतळे खराब झाल्याने यावरून महापालिकेवर टीकेची झोड उठली आहे.