उरण, ता. २९ (वार्ताहर) : तालुक्यातील करळ, सोनारी जंक्शन हे दोन्ही भाग सध्या मद्यपींसाठी अड्डा बनले आहेत. या ठिकाणी टपरीधारकांनी आपले वर्चस्व निर्माण करत, उघडपणे दारूविक्री आणि रस्त्यावर मद्यपान सुरू केल्यामुळे परिसरात अस्वस्थतेचे वातावरण निर्माण झाले आहे. दिवसाढवळ्या होणाऱ्या मद्यपानामुळे स्थानिक नागरिक त्रस्त झाले असून, महिलांनी पुढाकार घेत या गैरप्रवृत्तींना आळा घालण्याची धडक भूमिका घेत टपरीचालकांना फैलावर घेतले.
करळ, सोनारी जंक्शन हे उरण तालुक्याच्या दृष्टीने महत्त्वाचे आणि दळणवळणाच्या दृष्टीने गजबजलेले केंद्र आहे. काही दिवसांपासून या भागातील टपऱ्यांमधून सर्रास गुटखा व देशी दारू विकली जात असल्याच्या तक्रारी सातत्याने येत होत्या. या टपऱ्यांवर दारूविक्रीबरोबरच पिण्याची मोकळी सोयही उपलब्ध करून दिली जात असल्यामुळे रस्त्यावरच मद्यधुंद मद्यपींची गर्दी दिसू लागली आहे. या प्रकरणाची तक्रार संबंधित प्रशासनाकडे वारंवार करण्यात आली होती; मात्र याकडे दुर्लक्ष झाल्याने अखेर गावातील महिलांनीच पुढाकार घेत धडक कारवाईचा निर्णय घेतला.
---------------
प्रशासनाकडून कारवाईची अपेक्षा
महिलांनी टपऱ्यांवर जाऊन चालकांना चांगलेच खडसावले आणि तत्काळ तेथील सफाई करण्यास भाग पाडले. टपऱ्यांच्या खाली साचलेल्या गटारांमधून हजारोंच्या संख्येने रिकाम्या दारूच्या बाटल्या, प्लॅस्टिक कचरा, गुटख्याच्या पुड्या बाहेर काढण्यात आल्या. टपऱ्यांवरील दारूविक्रीकडे दुर्लक्ष करणाऱ्या स्थानिक प्रशासनाविरोधात नागरिकांमध्ये संतापाची लाट पसरली आहे. आता तरी संबंधित यंत्रणांनी याची गंभीर दखल घ्यावी, अशी मागणी होत आहे.