जुईनगर, ता. २९ (बातमीदार) : तुर्भे येथील उड्डाणपुलाखाली जोडल्या जाणाऱ्या उपमार्गावर पावलोपावली खड्डे असल्याने वाहनचालक हैराण झाले आहेत. यंदा पावसाला लवकर सुरुवात झाल्याने खड्डे बुजवण्यासाठी पालिकेला कोणतीही संधी यावर्षी पावसाने दिली नाही. तुर्भे उड्डाणपुलाखाली दोन फूट खोल आणि मोठ्या आकाराचे खड्डे अपघाताला आमंत्रण देत आहेत.
आजही ठाणे-बेलापूर महामार्गालगत जुईनगर रेल्वेस्थानक ते तुर्भे रेल्वेस्थानकाला जोडणाऱ्या उपमार्गावर खड्डे असल्याने चारचाकी वाहने खिळखिळी झाली आहेत; तर दुचाकी व रिक्षाचालकांचे कंबरडे मोडत आहेत. सानपाडा गावातून ठाणे-बेलापूर रस्त्याला लागणारी वाहने या मार्गाचा सर्रास वापर करतात. दुचाकीपासून मोठमोठी वाहने ये-जा करत असतात. या परिस्थितीमुळे प्रवासी हैराण झाले आहेत. खड्ड्यांचा आकार मोठा असल्याने वाहनचालकांना खूपच शिताफीने आपली वाहने त्यातून बाहेर काढावी लागतात. दुचाकी आणि रिक्षासारखी वाहने तर खड्ड्यातून घालावी लागतात. येथे एकाच मार्गाने वाहने ये-जा करत असल्याने समोरील वाहन निघाल्याशिवाय दुसऱ्या वाहनाला जाणे शक्य होत नाही. त्यामुळे वाहनचालक त्रस्त झाले असून, हे खड्डे बुजवण्याची मागणी केली जात आहे.