ठाकूर व्हिलेज मुख्य मार्गावर कचरा
प्रवासी, वाहनचालक हैराण
कांदिवली, ता. २९ (बातमीदार) ः कांदिवली पूर्व ठाकूर गाव येथील सिंग इस्टेट गेट नंबर पाच परिसरातील मुख्य मार्गावर कचऱ्याचे ढिगारे साचलेले असतात. स्थानिक नागरिकांना प्रवासासाठी हा एकमेव मार्ग आहे. त्‍यामुळे दुर्गंधीने नागरिक हैराण झाले आहेत.
साचलेले कचऱ्याचे ढिगारे आणि कोसळणारा पाऊस यामुळे किटकांचा प्रादुर्भाव वाढत आहे. पालिकेने साचणाऱ्या या कचऱ्याबाबत योग्य उपाययोजना करून स्थानिक नागरिकांसह, प्रवासी आणि वाहनचालकांना दिलासा द्यावा, अशी मागणी केली जात आहे. ठाकूर गाव येथील सिंग इस्टेट गेट नंबर पाच परिसरातील रहिवासी सवयीप्रमाणे याच मार्गावर कचरा टाकतात. व्यावसायिक, फेरीवालेदेखील इथेच कचरा टाकत असल्‍याने नेहमीच येथे दुर्गंधी पसरलेली असते.
या परिसरात इंग्रजी शाळा, महाविद्यालय असल्‍याने पालक, विद्यार्थी वाहनचालकांची मोठ्या प्रमाणात नेहमीच वर्दळ दिसून येते. कचऱ्याच्या ढिगाऱ्यावर, मोकाट कुत्रे, गाई आणि कावळ्याचा वावर वाढतो. त्‍यामुळे कचरा रस्त्यावर पसरतो.
येथील कचऱ्याबाबत योग्‍य त्‍या उपाययोजना करण्यात येत आहेत. येथे नियमित साफसफाई केली जाते, अशी प्रतिक्रिया सहाय्यक अभियंता नीलेश पाटील यांनी दिली.