कासा, ता. २९ (बातमीदार)ः आमगाव डोंगरीपाडा येथे बुलेट ट्रेन प्रकल्पात ७ ऑगस्ट २०२४ रोजी खड्ड्यात पडून शित्र्या गोवारी या कामगाराचा मृत्यू झाला होता. या घटनेतील गोवारी कुटुंबाला सात लाखांचा धनादेश सुपूर्द करण्यात आला.
बुलेट ट्रेन प्रकल्पाचे काम करणाऱ्या कंपनीकडून प्रकल्पातील मृत कामगाराच्या कुटुंबाला तत्काळ आर्थिक मदत मिळावी, यासाठी आमदार विनोद निकोले यांनी सातत्याने पाठपुरावा केला होता. वेळोवेळी पत्रव्यवहार केल्यानंतर त्यांच्या प्रयत्नांना अखेर यश आले आहे. डहाणू येथील माकप कार्यालयात शनिवारी (ता. २८) गोवारी कुटुंबाला आर्थिक मदतीचा धनादेश देण्यात आला. या वेळी आमदार विनोद निकोले, कॉ. दसू रडे (टीडीसी बँक संचालक), कॉ. रामू पागी (माजी जिल्हा परिषद सभापती), शैलेश करमोडा (माजी जिल्हा परिषद सदस्य), राकेश सक्सेना (कर्मचारी, एल अँड टी कंपनी) आणि अन्य पदाधिकारी उपस्थित होते.