विद्यापीठाच्या उपकेंद्राचा शैक्षणिक दर्जा सुधारणार
अ‍ॅड. निरंजन डावखरे यांच्या आमदार निधीतून आधुनिक सुविधा
सकाळ वृत्तसेवा
ठाणे, ता. २९ ः ठाणे जिल्ह्यातील विद्यार्थ्यांना उच्च शिक्षणाची संधी उपलब्ध करून देणाऱ्या मुंबई विद्यापीठाच्या ठाणे येथील धर्मवीर आनंद दिघे उपकेंद्राचा दर्जा आता आणखी सुधारणार आहे. आमदार अ‍ॅड. निरंजन डावखरे यांच्या आमदार निधीतून या उपकेंद्रात नवीन संगणक, वर्गांमध्ये साउंड सिस्टिम लावण्यात आले आहे. याशिवाय विद्यार्थ्यांच्या सुरक्षेसाठी उपकेंद्राच्या आवारात सीसीटीव्ही कॅमेरेही बसवण्यात आले आहेत.
मुंबई विद्यापीठाच्या ठाणे येथील धर्मवीर आनंद दिघे उपकेंद्रामध्ये बीबीए, एलएलबी, बीएमएस, एमएमएस यांसारखे महत्त्वाचे अभ्यासक्रम चालवले जातात, ज्यामुळे ठाणे जिल्ह्यातील असंख्य विद्यार्थ्यांना उच्च शिक्षण घेण्याची संधी मिळते, मात्र तरीही या उपकेंद्रामध्ये सोयीसुविधांचा अभाव होता. याची दखल घेत आमदार अ‍ॅड. निरंजन डावखरे यांनी येथे सुविधा उभारण्यासाठी निधी उपलब्ध करून दिला आहे. या कार्यक्रमाला निरंजन डावखरे हे प्रमुख पाहुणे म्हणून उपस्थित होते. मुंबई विद्यापीठाचे कुलगुरू डॉ. रवींद्र कुलकर्णी हे कार्यक्रमाचे अध्यक्ष होते. सोबत प्र कुलगुरू डॉ. अजय भामरे, कुलसचिव डॉ. प्रसाद कारंडे यांसह इतर मान्यवर उपस्थित होते. मुंबई विद्यापीठाच्या मागे आपण सर्व भक्कमपणे उभे आहोत. ही साथ आणि सहकार्य कायम राहिल्यास मुंबई विद्यापीठही जागतिक स्पर्धेत सातत्याने अग्रस्थानी राहील, असा विश्वास आणि अपेक्षा या वेळी अ‍ॅड. निरंजन डावखरे यांनी व्यक्त केला. विद्यापीठ परिसराकडे जाणाऱ्या रस्त्याची स्थिती सुधारण्यासाठीसुद्धा आपण वचनबद्ध आहोत, असे आश्वासित केले. एका विनंतीवर निधी मंजूर कोणतीही अधिकृत लेखी मागणी किंवा वारंवार पाठपुरावा न करता, फक्त तोंडी विनंतीनंतर आमदार निरंजन डावखरे यांनी एका महिन्यात हा निधी मंजूर करून वितरित केला. त्यांच्या या योगदानामुळे ठाणे परिसरातील शैक्षणिक विकासाला अधिक चालना मिळेल आणि विद्यार्थ्यांना आधुनिक तंत्रज्ञानावर आधारित शिक्षण घेण्यास मदत होईल, असा विश्वास मुंबई विद्यापीठाचे कुलगुरू प्राध्यापक डॉ. रवींद्र कुलकर्णी यांनी या वेळी व्यक्त केला.
......
सीसीटीव्‍हीची सुरक्षा
या निधीतून ३० संगणक व त्यासोबत प्रिंटर, १५ वर्गांसाठी अत्याधुनिक साउंड सिस्टिम व २ टेलीव्‍हिजन संच, तसेच संपूर्ण परिसराच्या सुरक्षेसाठी सीसीटीव्ही प्रणाली यांसारख्या आधुनिक सुविधा उपलब्ध करून देण्यात आल्या आहेत. यासर्व सुविधांचे लोकार्पण नुकतेच झाले.