वाशी, ता. २९ (बातमीदार) : नवी मुंबई महापालिका आणि डॉ. नानासाहेब धर्माधिकारी प्रतिष्ठान, रेवदंडा, अलिबाग यांच्या संयुक्त विद्यमाने सायन-पनवेल महामार्ग तसेच बेलापूर, नेरूळ, जुईनगर, सानपाडा, वाशी या पाच रेल्वेस्थानकांच्या परिसराची सखोल स्वच्छता करून हा परिसर चकाचक करण्यात आला. यामध्ये २२ टन कचरा संकलित करण्यात आला तसेच अस्ताव्यस्त वाढलेले गवत, वेली यांचाही हरित कचरा संकलित करण्यात आला. डॉ. नानासाहेब धर्माधिकारी प्रतिष्ठानचे तीन हजार ५०० हून अधिक श्रीसदस्य तसेच नागरिकांनी एकत्र येऊन ही स्वच्छता मोहीम राबवली.
उरण फाटा येथून आयुक्त डॉ. कैलास शिंदे यांच्या उपस्थितीत स्वच्छतेची सामूहिक शपथ घेऊन प्रारंभ झालेल्या या स्वच्छता मोहिमेचे विभागनिहाय नियोजन करण्यात आले होते. प्रत्येक ठिकाणी श्रीसदस्यांची लक्षणीय उपस्थिती होती. उरण फाटा येथे आयुक्तांसमवेत अतिरिक्त आयुक्त डॉ. राहुल गेठे, घनकचरा व्यवस्थापन विभागाच्या परिमंडळ १चे उपायुक्त डॉ. अजय गडदे व परिमंडळ २चे उपायुक्त स्मिता काळे, परिमंडळ १चे उपायुक्त सोमनाथ पोटरे, समाजविकास विभागाचे उपायुक्त किसनराव पलांडे, बेलापूर विभागाचे सहाय्यक आयुक्त डॉ. अमोल पालवे आणि इतर मान्यवर उपस्थित होते.
-----------------
१ जुलैपासून देशभरात अभियान
केंद्र सरकारमार्फत स्वच्छ भारत मिशनअंतर्गत १ जुलैपासून ‘सफाई अपनाओ, बिमारी भगाओ’ हे अभियान संपूर्ण देशभरात राबविले जात आहे. नवी मुंबई महापालिकेने त्याची सुरुवात आधीपासूनच जागतिक योगदिनाच्या कार्यक्रमातून केली असून, आजचा उपक्रम त्याच अभियानाचा भाग असल्याचे आयुक्त डॉ. कैलास शिंदे यांनी सांगितले. स्वच्छता आणि आरोग्य या दोन्ही परस्परपूरक गोष्टी असल्याने तसेच पावसाळा कालावधीत कीटकजन्य आजारांचा प्रादुर्भाव वाढत असल्याने त्याचे उच्चाटन करण्यासाठी ही स्वच्छता मोहीम राबविली जात असल्याची माहिती त्यांनी दिली.
---------------------
स्वच्छता मोहिमेचे नियोजन
सकाळी ७.३० वाजल्यापासून सुरू झालेल्या सायन-पनवेल महामार्ग स्वच्छता मोहिमेचे व्यवस्थित नियोजन करण्यात आले होते. बेलापूरपासून महापालिका हद्द ते कोकण भवन सर्कल, कोकण भवन सर्कल ते उरण फाटा ब्रिज सर्कल, उरण फाटा सर्कल ते डी. वाय. पाटील कॉलेज सर्कल, डी. वाय. पाटील कॉलेज सर्कल ते शिरवणे अंडरपास ब्रिज, शिरवणे अंडरपास ब्रिज ते जुईनगर उड्डाणपूल, जुईनगर उड्डाणपूल ते सानपाडा पूल, सानपाडा दत्तमंदिर ते सानपाडा रेल्वेस्थानक सर्कल, सानपाडा रेल्वेस्थानक सर्कल ते वाशी सर्कल, वाशी सर्कल ते वाशी गाव बसस्थानक, वाशी गाव बसस्थानक ते वाशी टोलनाका अशाप्रकारे स्वतंत्र गट करून श्रीसदस्य, नागरिक यांना क्षेत्र वाटप करून देण्यात आले होते. त्याचप्रमाणे बेलापूर, नेरूळ, जुईनगर, सानपाडा, वाशी या पाच रेल्वेस्थानकांच्या परिसरात सफाईसाठीही गटनिहाय नियोजन करण्यात आले होते.