कृषी उत्पन्न बाजार समितीवर महायुतीचा वरचष्मा
१८ जागांपैकी १५ जागांवर विजयी; महाविकास आघाडीला केवळ दोन जागा
कल्याण, ता. ३० (वार्ताहर) : कल्याण कृषी उत्पन्न बाजार समितीच्या सार्वत्रिक निवडणुकीत महायुतीचा विजय झाला असून, एकूण १८ जागांपैकी १५ जागा महायुतीने जिंकल्या आहेत. दोन जागांवर महाविकास आघाडी, तर एक जागेवर अपक्ष उमेदवाराने विजय मिळवला.

कल्याण कृषी उत्पन्न बाजार समितीच्या निवडणुकीचा निकाल शनिवारी (ता. २८) रात्री उशिरा जाहीर करण्यात आला. निवडणुकीत पार पडलेल्या मतदान प्रक्रियेला मतदारांनी भरभरून प्रतिसाद दिला. शनिवारी सकाळी ७ वाजता मतदानासाठी मोठी गर्दी केली होती, तर सायंकाळी ५ पर्यंत मतदानाला उत्स्फूर्त प्रतिसाद मिळाला. एकूण मतदानाच्या ९०.३७ टक्के मतदानाची नोंद करण्यात आली. २३५८ मतदारांपैकी तब्बल २१३१ मतदारांनी मतदानाचा हक्क बजावला, यामध्ये महिलांचा सहभागही लक्षणीय होता.

कल्याण कृषी उत्पन्न बाजार समितीच्या १८ जागांपैकी एकूण १७ जागांसाठी हे मतदान झाले असून, एक उमेदवार बिनविरोध निवडून आला. कल्याण कृषी उत्पन्न बाजार समितीच्या निवडणुकीत १५५ उमेदवारांनी उमेदवारी अर्ज दाखल केला होता. त्यापैकी १५ अर्ज बाद झाल्याने प्रत्यक्षात निवडणुकीच्या रिंगणात ५१ उमेदवारांनी नशीब आजमावले होते.

विजयी उमेदवार
निवडणुकीत रवींद्र घोडविंदे, कपिल थळे, भरत गोंधळे, योगेश धुमाळ, अरुण पाटील, जालिंदर पाटील, मनोहर पाटील, विद्या पाटील, शारदा पाटील, वसंत लोणे, रवींद्र आव्हाड, नरेश सुरोशी, रवींद्र भोईर, किशोर वाडेकर, विजय सुरोशी, काशिनाथ नरवडे आणि गिरीश पाटील हे उमेदवार जिंकले असून, हमाल व तोलाई गटातील शंकर आव्हाड हे बिनविरोध निवडून आल्याची माहिती निवडणूक निर्णय अधिकारी विशाल जाधव यांनी दिली.