नेरूळ, ता. ३० (बातमीदार) : नेरूळ सेक्टर सहा परिसरात महापालिकेकडून दूषित पाणीपुरवठा होत आहे. याची चौकशी करून त्यावर तोडगा काढण्याची मागणी काँग्रेसचे प्रभाग ८६चे अध्यक्ष जीवन गव्हाणे यांनी महापालिका आयुक्त कैलास शिंदे यांच्याकडे केली आहे. नेरूळ सेक्टर सहा परिसरात अनेक दिवसांपासून महापालिका प्रशासनाकडून दूषित पाणीपुरवठा करण्यात येत आहे. सध्याचा पावसाळा, जलवाहिन्यांची सतत होत असलेली कामे यामुळे सुरुवातीला गढूळ, तांबूस, पिवळसर पाणी येत असल्याचा समज होता; परंतु दूषित पाण्याची समस्या अनेक दिवसांपासून असून, त्यामुळे नेरूळ सेक्टर सहामधील रहिवासी पोटदुखीच्या आजाराने त्रस्त आहेत. या समस्येचे गांभीर्य पाहता दूषित पाण्याच्या समस्येवर तोडगा काढून रहिवाशांना स्वच्छ पाणीपुरवठा करण्याचे संबंधितांना निर्देश देण्याची मागणी जीवन गव्हाणे यांनी महापालिका आयुक्तांकडे केली आहे.