पेण, ता. १ (वार्ताहर) : मुंबई-गोवा महामार्गाचे काम १५ वर्षांपासून सुरू असून, आजही अपूर्णच आहे. पेण-वडखळदरम्‍यान काँक्रीटीकरणाचे काम पूर्ण झाले असले तरी मार्गालगत गावांसाठी बांधण्यात आलेल्‍या भुयारी मार्गाची दुरवस्‍था झाली आहे. त्या ठिकाणी मोठमोठे खड्डे पडले असून, पाणी साचल्‍याने खोलीचा अंदाज येत नसल्‍याने वाहने उसळतात. परिणामी चालकांसह प्रवाशांमध्ये मानदुखी, कंबरदुखीच्या व्याधी बळावल्‍या आहेत.
कोकणातील एकमेव असणारा मुंबई-गोवा महामार्गाचे चौपदरीकरण करण्यात येत आहे. वडखळ ते नागोठणेदरम्यान अनेक ठिकाणी कामे सुरू असून, गणेशोत्सवापर्यंत पूर्ण होण्याची शक्‍यता धूसर आहे. लगतच्या गावांत जाण्यासाठी महामार्गाजवळ भुयारी मार्ग तयार करण्यात आला आहे, परंतु तरणखोप, अंतोरे फाटा, झी गार्डन हॉटेल, रामवाडी, वडखळ आदी ठिकाणी मोठमोठे खड्डे पडले आहेत. या खड्ड्यांमध्ये पाणी साचल्याने नागरिकांसह वाहनचालकांची डोकेदुखी वाढली आहे. पेणच्या गडबपासून पुढे कोलेटी, नागोठणे, कोलाडदरम्यान चौपदरीकरणाचे काम संथ गतीने सुरू असून, अनेक ठिकाणी काम अपूर्ण आहे.

मुंबई-गोवा महामार्गाच्या चौपदरीकरणाचे काम अपूर्ण आहे. त्यामुळे याही वर्षी कोकणात जाणाऱ्या गणेशभक्तांना फटका बसणार आहे. संबंधित ठेकेदाराने किमान ग्रामीण भागात जाणाऱ्या नागरिकांसाठी असलेल्‍या भुयारी मार्गाची दुरुस्ती करून घ्यावी. तसेच साचलेल्‍या पाण्याचा निचरा होण्यासाठी नियोजन करावे.
- हरिश बेकावडे, सामाजिक कार्यकर्ते

मुंबई-गोवा महामार्गाच्या सर्व भुयारी मार्गांची पाहणी करण्यात येणार आहे. तसेच खड्डे बुजवण्याचे तसेच पाण्याचा निचरा होण्यासाठी योग्‍य नियोजन केले जाईल. महामार्गावरील खड्डे बुजवण्याबाबत कंत्राटदाराला सांगण्यात येईल.
- यशवंत घोटकर, अधिकारी, मुंबई-गोवा महामार्ग