रास्त धान्याचा काळाबाजार
भिवंडी गुन्हे शाखेकडून धान्यसाठा जप्त
भिवंडी, ता. २ (वार्ताहर) : गरीब जनतेसाठी रेशनिंगवर वितरित केला जाणारा धान्यसाठा टेम्पोतून शहापूर येथे काळ्या बाजारात विक्रीसाठी घेऊन निघाले होते, या वेळी राजनोली नाका येथे भिवंडी गुन्हे शाखेने केलेल्या कारवाईत दीड लाखांचा धान्यसाठा जप्त करण्यात आला. या वेळी दोन रास्त धान्य दुकानदारांसह टेम्पोचालकाविरोधात गुन्हा दाखल करण्यात आला आहे.
मुलुंड येथील रेशनिंग दुकानदार पीयूश ओधाजी ठक्कर, रमेश भानुशाली यांनी आपल्या दुकानातून नागरिकांना शासकीय धान्यसाठ्यातून वितरणासाठी आलेला तांदूळ, गहू, साखर, डाळी इत्यादी एक लाख ४९ हजार रुपयांचा धान्यसाठा टेम्पोतून शहापूरच्या दिशेने जात असल्याची माहिती भिवंडी गुन्हे शाखेला मिळाली होती. त्यानुसार सहाय्यक पोलिस निरीक्षक धनराज केदार यांच्या नेतृत्वाखालील पथकाने राजनोली नाका या ठिकाणी सापळा रचून मंगळवारी (ता. १) दुपारी साडेतीन वाजताच्या सुमारास संशयित टेम्पो येताच त्याला थांबवून तपासणी केली. टेम्पोत या दुकानदारांनी स्वतःच्या आर्थिक फायद्यासाठी रेशन दुकानावरील धान्यसाठा काळ्या बाजारात विक्रीसाठी घेऊन जात असल्याचे निष्पन्न झाले. भिवंडी गुन्हे शाखेच्या वतीने कोनगाव पोलिस ठाण्यात दिलेल्या तक्रारीवरून पोलिसांनी पीयूश ठक्कर, रमेश भानुशाली व टेम्पोचालक रविकिशन सिंग या तिघांविरोधात गुन्हा दाखल केला आहे. तसेच आठ लाख ४९ हजार रुपये किमतीचा धान्यसाठा टेम्पोसह जप्त केला आहे. या गुन्ह्याचा पुढील तपास गुन्हे शाखेचे सहा. पोलिस निरीक्षक धनराज केदार हे करीत आहेत.