नवी मुंबई, ता. २ (वार्ताहर) : अमेरिका येथील बर्मिंगहॅम, आलाबामा वर्ल्ड पोलिस अँड फायर गेम्स २०२५ स्पर्धा सुरू आहे. या स्पर्धेत नवी मुंबईतील पोलिस निरीक्षक सुभाष पुजारी यांनी दोन सुवर्णपदकांची घवघवीत कमाई करत संपूर्ण देशाचे नाव उज्ज्वल केले आहे.
अमेरिका येथील बर्मिंगहॅम, आलाबामा येथे २६ जून ते ६ जुलैदरम्यान वर्ल्ड पोलिस अँड फायर गेम्स २०२५ ही स्पर्धा सुरू आहे. या स्पर्धेत ७६ देशांतील स्पर्धक सहभागी झाले आहेत. स्पर्धेत पोलिस निरीक्षक सुभाष पुजारी यांनी शरीरसौष्ठव (१७२ सेमी उंची गट) व मेन फिजिक या दोन प्रकारांमध्ये सुवर्णपदक पटकावले आहे. या स्पर्धेसाठी पुजारी यांनी दररोज सहा तास कठोर सराव केला. मिस्टर ऑलिम्पिया सुनीत जाधव यांच्या मार्गदर्शनाखाली त्यांनी सराव केला. या आधीही पुजारी यांनी १० आंतरराष्ट्रीय पदके जिंकण्याचा विक्रम केला आहे. त्यामुळे त्यांना मिळालेल्या दोन सुर्णपदकांमुळे त्यांच्या यशस्वी वाटचालीत आणखी एक मोलाची भर पडली आहे. पोलिस दलातील वरिष्ठ पोलिस अधिकारी, सहकारी मित्र, सामाजिक आणि राजकीय क्षेत्रातील मान्यवरांकडून पुजारी यांच्यावर अभिनंदनाचा वर्षाव होत आहे.