जुगार अड्ड्यावर पोलिसांचा छापा
अंबरनाथमध्ये १२ जणांवर गुन्हा दाखल
अंबरनाथ ता. ३ (वार्ताहर) : शहरातील एका घरात जुगार खेळत असताना पोलिसांनी छापा टाकला. या वेळी १२ जण मटका नावाचा जुगार खेळत असल्याचे आढळून आले. त्यानुसार पोलिसांनी या १२ ही जणांवर गुन्हा दाखल केला. महिनाभरातील पोलिसांनी केलेली ही तिसरी कारवाई आहे.
अंबरनाथ शहरात मोठ्या प्रमाणात जुगार अड्डे सुरू आहेत. गेल्या काही दिवसांपासून सातत्याने पोलिस कारवाई सुरू आहे. काही दिवसांपूर्वीच पोलिसांनी दोन गाळ्यांवर छापा टाकला होता. या वेळी १५ ते २० जणांवर गुन्हे दाखल करून सुमारे ३५ हजारांचा मुद्देमाल हस्तगत केला होता. दरम्यान, पोलिसांची ही कारवाई सुरू असून, बुधवारी (ता. २) रात्री १०च्या सुमारास अशोक गायकवाड या व्यक्तीच्या घरात जुगार खेळत असल्याची माहिती पोलिसांनी मिळाली होती. या माहितीच्या अनुषंगाने पोलिसांनी पश्चिमेच्या वांद्रापाडा परिसरातील गायकवाडच्या घरी छापा टाकला. बिजी बाबू (वय ३७), मुदशर रफिक शेख (३६), प्रमोद रामदेव रसाळ (४७), संतोष कैलास गौड (४०), अशोक रोहिदास गायकवाड (४३), आयप्पा बाजीराव मुदलीयार (३१), अमित उमाजी गायकवाड (२०), मेहबूब खालील शेख (२३), विजय अशोक पाटील (२८), मनोज मंगल कंगाले (३३), विकास दत्ता लाठे (२४), किरण गागडे यांना मटका खेळताना ताब्यात घेतले. त्यांच्यावर गुन्हे दाखल केले आहेत.