मुरबाड, ता. १० (वार्ताहर)ः केंद्रीय कामगार संघटनांच्या आवाहनानुसार पुकारलेल्या देशव्यापी संपाला अखिल भारतीय किसान सभा, मुरबाड तालुका समिती, सिटू संघटना, शहापूर व मुरबाड तालुका समितीने पाठिंबा दिला आहे. छत्रपती शिवाजी चौक ते तहसीलदार कार्यालय मुरबाड दरम्यान रॅली काढून तहसीलदार कार्यालयावर धडक दिली. या आंदोलनात शहापूर व मुरबाड तालुक्यातील हजारो कामगार, शेतकरी सहभागी झाले.
शेतकऱ्यांच्या सर्व पिकांना उत्पादन खर्चाच्या दीडपट भावाची कायदेशीर हमी द्या, लहान व मध्यम शेतकरी कुटुंबांना कर्जबाजारीपणापासून मुक्त होण्यासाठी सरसकट कर्जमुक्ती द्या, नवीन चारही श्रम संहिता रद्द करा; कामगारांना दरमहा ३० हजारांचे किमान वेतन द्या, रेल्वे, संरक्षण, वीज, कोळसा, तेल, पोलाद, दूरसंचार, पोस्ट, वाहतूक, विमानतळ, बंदर, गोदी, बँका, विमा सार्वजनिक उद्योगांचे, शिक्षण आणि आरोग्याचे, खासगीकरण थांबवा, सरकारी नोकऱ्यांचे कंत्राटीकरण बंद करा, सर्व रिक्त पदे त्वरित भरा, मनरेगामध्ये २०० दिवस काम आणि दररोज ६०० रुपये मजुरी देऊन ही योजना बळकट करा, जुनी पेन्शन योजना पुन्हा सुरू करा, संघटित तसेच असंघटित क्षेत्रात पेन्शन आणि सामाजिक सुरक्षेची तरतूद अनिवार्य करा, मुरबाड, शहापूर औद्योगिक पट्ट्यातील बंद कारखाने सुरू करून स्थानिकांना रोजगार द्या, अशी मागणी केली.
------------------------------------
काही काळासाठी वाहतूक कोंडी
आंदोलनाचे नेतृत्व कॉम्रेड विजय विशे, सिटू राज्य समिती सदस्य, कॉम्रेड डॉ. कविता वरे, किसान सभा, राज्य समिती सदस्या, कॉम्रेड दिलीप कराळे, सिटू मुरबाड तालुका अध्यक्ष, कॉम्रेड सागर भावार्थ, सिटू मुरबाड तालुका सचिव, कॉम्रेड लक्ष्मण भांडे, किसान सभा मुरबाड तालुका अध्यक्ष यांनी केले. मागण्यांचे निवेदन स्वीकारायला तहसीलदार अभिजित देशमुख मोर्चास्थळी प्रत्यक्ष उपस्थित होते. या वेळी हजारोच्या संख्येने आंदोलक सहभागी झाल्याने काही काळासाठी वाहतूक कोंडी झाली होती.