सकाळ वृत्तसेवा
नवी मुंबई, ता. १२ ः नवी मुंबई महापालिकेच्या वाशीतील सार्वजनिक रुग्णालयात लवकरच रुग्‍णांना एमआरआय सुविधा मिळणार आहे. रुग्णांना अत्याधुनिक आरोग्य चाचण्या करण्यासाठी महापालिका एमआरआय मशीन खरेदी करणार असून त्याकरिता आरोग्य विभागातर्फे निविदा मागवणार आहे.
नवी मुंबई महापालिकेतर्फे आरोग्य सुविधा अधिक सक्षम करण्याचा वेळोवेळी प्रयत्न सुरू आहे. सध्या ऐरोली, घणसोली, वाशी, नेरूळ आणि बेलापूर या ठिकाणी सार्वजनिक रुग्णालय चालवण्यात येते. महापालिकेच्या रुग्णालयात प्रसूती करण्यात येत होती. आता वाशी रुग्णालयात विविध आजारांवर शस्‍त्रक्रिया करण्यास सुरुवात झाली आहे.
वाशीतील सार्वजनिक रुग्णालय हे सध्या महापालिकेचे महत्त्वाचे रुग्णालय आहे. या रुग्णालयात नवी मुंबईसह महापालिका हद्दीच्या बाहेरून मुंबई, ठाणे, रायगड जिल्ह्यातून रुग्ण येतात. माफक दरात रुग्‍णांना महापालिकेतर्फे सुविधा दिल्या जातात. बऱ्याच आजारांमध्ये सीटीस्कॅन आणि एमआरआयसारख्या चाचण्या कराव्या लागतात. महापालिकेच्या रुग्णालयात या सुविधा नसल्यामुळे अनेकांना खासगी प्रयोगशाळेत जावे लागते. नवी मुंबईत वाशी, नेरूळ याठिकाणी असणाऱ्या खासगी प्रयोगशाळेत एमआरआय चाचण्या रुग्णांना खर्चिक ठरतात. अशा वेळी महापालिकेतर्फे खरेदी केली जाणारी एमआरआय करणारी मशीन अनेक गरजू आणि गरीब रुग्णांना होणाऱ्या दुर्मिळ आजारांचे निदान करण्यासाठी महत्त्वाची ठरणारी आहे.

सीटीस्कॅन सुविधा उपलब्ध
नवी मुंबई महापालिकेतर्फे वाशी येथील सार्वजनिक रुग्णालयात सीटीस्कॅन सुविधा उपलब्ध आहे. ही मशीन महापालिकेला सीएसआर फंडातून उपलब्ध झाली आहे. या मशीनद्वारे महापालिकेने एका त्रयस्थ संस्थेमार्फत रुग्णांना माफक दरात सीटीस्कॅन सुविधा दिली जात आहे.

त्रयस्थ संस्थेमार्फत चालवणार मशीन
एमआरआय मशीन खरेदी करण्यासाठी १५ ते २५ कोटी रुपयांचा अंदाजे खर्च येणार आहे. त्यादृष्टीने महापालिकेतर्फे निविदा मागवण्यात येणार आहे. त्याकरिता रेडिओलॉजिस्टची गरज असल्याने ही मशीनदेखील त्रयस्थ संस्थेमार्फत चालवण्यात येणार असल्याचे समजते.