महावितरणच्या मुख्य वाहिनीमध्ये छेडछाड करून वीजचोरी
नवी मुंबई, ता. १४ (वार्ताहर) : महावितरण कंपनीकडून सध्या वीजबिल वसुलीबरोबरच वीजजोडणी तपासणी मोहीम राबवण्यात येत आहे. याअंतर्गत नेरूळ विभागातील पाम बीच शाखेच्या अधिकाऱ्यांनी आणि कर्मचाऱ्यांनी तपासणी करून ५६ हजार ९०० रुपयांची वीजचोरी उघडकीस आणली आहे. या प्रकरणी वाशी पोलिस ठाण्यात विद्युत कायद्याअंतर्गत गुन्हा दाखल केला आहे.
नेरूळ येथील कुशेतगाव येथील कांचन ठाकूर यांनी मुख्य वाहिनीमध्ये छेडछाड करून अनधिकृतपणे थेट एमसीबीमार्फत वीजपुरवठा घेतला होता. कांचन ठाकूर यांच्या मीटरची अधिकाऱ्यांनी तपासणी केली असता, हा प्रकार उघडकीस आला. मीटरच्या केबिनबाहेरून अडीच चौरस मिमीची वायर थेट घरात वळवण्यात आली होती. तपासणीत या वायरचा वापर सुमारे एक किलोवॉट भारासाठी सुरू असल्याचे स्पष्ट झाले. तसेच संबंधित घराचा वीजपुरवठा ६ ऑक्टोबर २०२३ रोजी खंडित करण्यात आला होता. म्हणजेच गेल्या १४ महिन्यांपासून त्यांच्या घरामध्ये अनधिकृतरीत्या वीज वापर सुरू असल्याचे तपासणीत आढळून आले.
या दरम्यान कांचन ठाकूर यांनी ५६ हजार ९०० रुपये किमतीच्या एकूण दोन हजार ५९८ युनिट विजेचा वापर केल्याचे आढळून आले आहे. याआधीची त्यांची पीडी थकबाकी २५ हजार ९५० असल्याने महावितरणचे एकूण ८२ हजार ८५०चे आर्थिक नुकसान झाल्याचे स्पष्ट झाले आहे. त्यानुसार महावितरणच्या अधिकाऱ्यांनी कांचन ठाकूर यांच्याविरोधात वीजचोरीसंदर्भात गुन्हा दाखल केला आहे. ही कारवाई अधीक्षक अभियंता दीपक पाटील यांच्या मार्गदर्शनाखाली कार्यकारी अभियंता सुहास बेडगकर आणि सहाय्यक अभियंता हेमंत चोरे तसेच संतोष कोलेकर, राहुल झेंडे यांच्यासह पार पाडली.
वीजचोरी ही महावितरणच्या आर्थिक नुकसानीबरोबरच प्रामाणिक ग्राहकांवर अन्याय करणारी गोष्ट आहे. त्यामुळे सर्व नागरिकांनी अधिकृत वीज वापर करावा व नियमितपणे वीजबिल भरावे, असे आवाहन भांडूप परिमंडळाचे मुख्य अभियंता संजय पाटील यांनी केले आहे. तसेच यापुढे वीज चोरीप्रकरणी अधिक कठोर कारवाई केली जाईल, असा इशाराही त्यांनी दिला आहे.