रेबीज झालेल्या कुत्र्यावर तातडीने कारवाई
नगर परिषदेच्या पथकाचे नागरिकांकडून कौतुक
कर्जत, ता. २० ः शहरातील मावकर हॉटेलजवळ एका कुत्र्याला रेबीज झाल्याचा प्रकार समोर आला होता. या कुत्र्याने मागील दोन दिवसांत तब्बल पाच नागरिकांना चावा घेतल्याची माहिती समोर आल्याने परिसरात भीतीचे वातावरण निर्माण झाले होते. यासंदर्भात नागरिकांनी कर्जत शहर बचाव समिती व्हॉट्सॲप ग्रुपवर तीव्र संताप व्यक्त केला आणि कर्जत नगर परिषदेच्या कामकाजावर प्रश्नचिन्ह उपस्थित केले. झोपलेली नगर परिषद केव्हा जागी होणार, असा सवाल करत एकाने ही बाब सोशल मीडियावर मांडली. यावर नागरिकांनी तातडीची कारवाई करण्याची मागणी केली.
याची मुख्याधिकारी तानाजी चव्हाण आणि त्यांच्या टीमने गंभीर दखल घेतली. त्यांनी तत्काळ पथकाला घटनास्थळी पाठवले. अवघ्या काही तासांतच पथकाने या कुत्र्याचा शोध घेऊन त्याला मावकर हॉटेलजवळून पकडले. पेट्स फोर्स ॲनिमल वेल्फेअर या संस्थेमार्फत कर्जत नगर परिषद हद्दीतील भटक्या कुत्र्यांवर नसबंदी, संगोपन आणि उपचार केले जातात. पकडण्यात आलेल्या रेबीज संशयित कुत्र्यावरही याच संस्थेमार्फत योग्य ते उपचार आणि तपासणी करण्यात येणार आहे.
या यशस्वी कारवाईसाठी निकेश फाळे यांच्या विशेष सहकार्याने नगर परिषदेच्या पथकाने वेगाने आणि प्रभावी कामगिरी बजावली. या कामगिरीबद्दल त्यांच्या टीमचे सर्वत्र कौतुक होत आहे. नागरिकांनी उपस्थित केलेल्या समस्येवर तातडीने पावले उचलल्यामुळे नागरिकांमध्ये समाधानाचे वातावरण आहे. भविष्यात अशा घटनांवर वेळीच उपाययोजना व्हाव्यात, अशी अपेक्षा आता नागरिकांकडून व्यक्त होत आहे.