मुख्यमंत्र्यांच्या वाढदिवसानिमित्त रक्तदान आणि निधी दान

मुंबई, ता. २२ : मुख्यमंत्री देवेंद्र फडणवीस यांच्या वाढदिवसानिमित्त आमदार अतुल भातखळकर यांच्यातर्फे रक्तदान संकल्प शिबिर कांदिवली येथे मंगळवारी (ता. २२) पार पडले. मुंबई जिल्हा मध्यवर्ती सहकारी बँक, मजूर फेडरेशन आणि विभागीय मजूर फेडरेशन यांच्या वतीने मुख्यमंत्री सहाय्यता निधीला ११ लाख ७३ हजार २२२ रुपये देण्यात आले.
कांदिवली पूर्व येथे रक्तदान शिबिराची सुरुवात झाली. या वेळी आमदार अतुल भातखळकर यांनी रक्तदान केलेल्यांना प्रमाणपत्र देऊन त्यांचा गौरव केला. भाजपचे विधान परिषद गटनेते आणि मुंबई बँकेचे अध्यक्ष प्रवीण दरेकर यांच्या नेतृत्वाखाली मुंबई जिल्हा सहकारी बँक, मजूर फेडरेशन आणि विभागीय मजूर फेडरेशन यांच्या वतीने मुख्यमंत्री सहाय्यता निधीसाठी ११ लाख ७३ हजार २२२ रुपयांचा धनादेश फडणवीस यांना देण्यात आला. वाढदिवसानिमित्त शुभेच्छा जाहिराती, होर्डिंग, फ्लेक्स, बॅनर, पुष्पगुच्छ, हार यावर खर्च न करता ती रक्कम मुख्यमंत्री सहाय्यता निधीला द्यावी, असे आवाहन फडणवीस यांनी केले होते. त्यानुसार हे अर्थसाह्य करण्यात आले. या वेळी दरेकर यांच्यासह बँकेचे संचालक आनंदराव गोळे तसेच मजूर फेडरेशन आणि विभागीय फेडरेशनचे पदाधिकारी उपस्थित होते.