कापड कंपनीला भीषण आग
डोंबिवली एमआयडीसीतील घटना
सकाळ वृत्तसेवा
डोंबिवली, ता. २३ ः डोंबिवली एमआयडीसी फेज एकमधील ‘एरोसोल सर्व्हिस प्रायव्हेट लिमिटेड’ या कापड प्रोसेसिंग करणाऱ्या कंपनीला मंगळवारी (ता. २२) दुपारी आग लागली. कंपनीमध्ये कपड्याचा मोठ्या प्रमाणात साठा करून ठेवला असल्याने आगीने क्षणात रौद्ररूप धारण केले. आगीची माहिती मिळताच अग्निशमन दलाच्या गाड्या घटनास्थळी दाखल झाल्या. आग एवढी मोठी होती की, पाच ते सहा गाड्या आग नियंत्रणात आणण्यासाठी शर्थीचे प्रयत्न करीत होत्या. आगीमुळे कंपनीचे मोठ्या प्रमाणात नुकसान झाले असून यात कोणतीही जीवितहानी झालेली नाही.
कंपनीतील इलेक्ट्रिकल शॉर्टसर्किटमुळे आग लागली असावी, असा प्राथमिक अंदाज अग्निशमन दलाच्या जवानांनी वर्तविला आहे.

डोंबिवली एमआयडीसीतील फेज एकमधील कापड प्रोसेसिंग कंपनीला मंगळवारी दुपारी बारा वाजण्याच्या सुमारास अचानक आग लागली. कंपनीत कापड असल्यामुळे आगीने क्षणात रौद्ररूप धारण केले आणि आगीचे लोटच्या लोट कंपनीतून बाहेर पडू लागले. कंपनीला आग लागताच अग्निशमन दलाच्या जवानांना तत्काळ याची माहिती देण्यात आली. आग लागली त्या वेळी सकाळच्या सत्रात कंपनीत ६० ते ७० कामगार उपस्थित होते; मात्र त्यांनी प्रसंगावधान राखत वेळीच कंपनीतून बाहेर धाव घेतली आणि आपला जीव वाचवला. घटनेची माहिती मिळताच कल्याण अग्निशमन दलाचे प्रमुख नामदेव चौधरी यांनी आपल्या टीमसह घटनास्थळी येऊन आग नियंत्रणात आणण्यासाठी प्रयत्न सुरू केले; मात्र आग वाढतच असल्यामुळे अग्निशमन दलाच्या सहा ते सात गाड्या तसेच दोन टँकर घटनास्थळी बोलावण्यात आले, दुपारी दोन वाजेपर्यंत आग आटोक्यात आली नव्हती. आगीचा जास्त भडका होऊ नये, यासाठी अग्निशमन दलाचे जवान तसेच काही कर्मचाऱ्यांनी कंपनीत सिलेंडरचा साठा तत्काळ बाहेर काढले, त्यामुळे आग वाढली नाही.

अडीच तासांनी आग नियंत्रणात
दरम्यान, घटनेची माहिती मिळताच मानपाडा पोलिस, कामा संघटनेचे पदाधिकारी तसेच शेजारील कंपन्यांचे कर्मचारी घटनास्थळी जमा झाले होते. सकाळपासून डोंबिवली परिसरात पाऊस सुरू असल्याने आग वेगाने पसरली नाही, असे अग्निशमन दलाने सांगितले. या आगीत कंपनीचे मोठे नुकसान झाले असून कोणतीही जीवितहानी झालेली नाही. दोन ते अडीच तासांच्या अथक प्रयत्नांनंतर आगीवर नियंत्रण मिळवण्यास अग्निशमन दलास यश आले. सध्या कुलिंगचे काम सुरू असून कंपनीचा इमारतीचा ढाचा हा धोकादायक असल्याने अग्निशमन दलाच्या जवानांना खबरदारी घेऊन काम करावे लागत असल्याची माहिती नामदेव चौधरी यांनी दिली.