महिलांच्या आरोग्याबाबत आशा वर्कर्सनी जनजागृती करा
आयुक्त सौरभ राव यांच्या सूचना; कासारवडवलीमध्ये निरोगी महिला अभियान

सकाळ वृत्तसेवा

ठाणे, ता. २५ : महिलांचे आरोग्यमान सुधारावे तसेच आजाराचे योग्य वेळी निदान व्हावे, यासाठी उपमुख्यमंत्री निरोगी महिला अभियान ठाणे पालिकेच्या आरोग्य केंद्रात सुरू आहे. धकाधकीच्या जीवनात महिलांचे स्वत:च्या आरोग्याकडे दुर्लक्ष होत असते. आरोग्य ही गुंतवणूक असून योग्य वेळी महिलांनी तपासणी करावी, यासाठी विविध भागांत जाणाऱ्या आशा वर्कर्सनी महिलांमध्ये जनजागृती करून त्यांना या अभियानात सहभागी करण्याचे आवाहन महापालिका आयुक्त सौरभ राव यांनी केले.
ठाणे महापालिकेच्या कासारवडवली येथील रोझा गार्डनिया आरोग्य केंद्रात उपमुख्यमंत्री ‍निरोगी ‍महिला अभियान आयोजित केले होते. त्यावेळी ते बोलत होते. याप्रसंगी उपायुक्त उमेश बिरारी, वैद्यकीय आरोग्य अधिकारी डॉ. प्रसाद पाटील, माता व बालसंगोपन अधिकारी डॉ. वर्षा ससाणे, रोटरी क्लबचे अशोक महाजन आणि आशा वर्कर्स उपस्थित होत्या.
गर्भाशयाचा कर्करोगाविषयी समाजात जनजागृतीची गरज आहे. महिलांच्या बदलत्या जीवनशैलीचे परिणामही महिलांच्या आरोग्यावर होतात. त्यामुळे वेळच्या वेळी महिलांनी तपासणी करावी, अशी जनजागृती झोपडपट्टी विभागात करणे आवश्यक असल्याचेही आयुक्तांनी या वेळी नमूद केले. आशा वर्कर्सच्या माध्यमातून तसेच महापालिकेच्या आरोग्य केंद्रात तपासणीसाठी येणाऱ्या महिलांसोबत संवाद साधून त्यांना या अभियानात सहभागी होण्यासाठी प्रेरित करण्याच्या सूचनाही त्यांनी वेळी दिल्या. उपमुख्यमंत्री एकनाथ शिंदे यांच्या हस्ते १९ जुलै रोजी या अभियानाचा आरंभ कोरस आरोग्य केंद्र येथे केला होता. या वेळी दोन तासांत २६९ महिलांची गर्भाशय मुखाच्या कर्करोगाची तपासणी करण्यात आल्याचे आयुक्तांनी नमूद केले. यापुढे टप्प्याटप्प्याने ठाणे महापालिकेच्या सर्व आरोग्य केंद्रांत हे अभियान राबविले जाणार असल्याचे त्यांनी सांगितले.
-----------------------------
जीवनशैलीबाबत संवाद
दरम्यान, महिलांची विनामूल्य वैद्यकीय तपासणी या अभियानाच्या माध्यमातून करण्यात येत आहे. गर्भाशय मुखाचा कर्करोग, ९ ते १४ वयोगटातील मुलींसाठी एचपीव्ही लस, मधुमेह तसेच हिमोग्लोबिन तपासणी तसेच स्त्रियांच्या निरोगी आणि आरोग्यदायी जीवनशैलीबाबत संवाद आदींचा अंतर्भाव या अभियानात असल्याचे वैद्यकीय आरोग्य अधिकारी डॉ. प्रसाद पाटील यांनी नमूद केले. या वेळी आयुक्त सौरभ राव रोझा गार्डनिया या आरोग्य केंद्रातील डायलिसिस सेंटर, अतिदक्षता कक्ष, शस्त्रक्रिया कक्ष आदींची पाहणी केली.