घोडबंदर मार्गाच्या दुरुस्तीत खोडा
मिरा-भाईंदर पालिका हद्दीत रस्त्याची चाळण; चार किमी अंतरासाठी तासाभराचा वेळ
ठाणे शहर, ता. २७ (बातमीदार) : घोडबंदर रोड मार्गावर ठाणे महापालिकेच्या हद्दीत रस्ता रुंदीकरणाची कामे गतीने सुरू आहेत. विविध प्रकारची कामे सुरू असताना वाहतूक कोंडी होणार नाही, याची काळजी वाहतूक विभागाकडून घेतली जात आहे. एकाच वेळी ठाणे महापालिका, सार्वजनिक बांधकाम विभाग, एमएमआरडीए आणि मेट्रो प्रशासनाकडून कामे केली जात आहेत. त्यामुळे या मार्गावरील वाहतूक कोंडी नियंत्रणात आली आहे; मात्र मिरा-भाईंदर महापालिकेच्या हद्दीत रस्त्यांच्या दुरवस्थेचा फटका ठाण्यातील वाहतुकीला बसत आहे. गायमुख आणि त्यापुढील रस्त्यावर प्रचंड खड्डे पडल्याने या मार्गावर वाहनांची मोठी कोंडी होत आहे.

ठाणे महापालिकेच्या हद्दीतील मिरा-भाईंदर वाहिनीवर गायमुख घाटाची सार्वजनिक बांधकाम विभागाकडून दुरुस्ती करण्यात आली आहे. रस्त्यावर डांबराचे मास्टिंग केले आहे. त्यामुळे घाटावर चढताना वाहने बंद पडण्याचे प्रमाणात कमी झाले आहे; मात्र असे असले तरी घाट संपताच घाटाच्या माथ्यावरून पुढे रस्त्यांची दयनीय अवस्था झाली आहे. दोन्ही बाजूला रस्त्यांवर मोठमोठे खड्डे पडलेले आहेत, तर काही ठिकाणी तर संपूर्ण रस्ताच उखडलेला आहे. रस्त्याच्या दुरवस्थेमुळे या ठिकाणी वाहनांची वाहतूक प्रचंड प्रमाणात मंदावत आहे. त्यामुळे वाहनांच्या मोठ्या रांगा लागत आहेत. हलक्या वाहनांनादेखील या रस्त्याने पुढे जाणे कठीण होत आहे. रात्रीच्या वेळी आणि सकाळी जड-अवजड वाहने कासवगतीने पुढे सरकतात. या वेळेत दोन्ही वहिनींवर हजारो वाहनांची गर्दी असते. त्यामुळे माजिवडा ते थेट फाउंटन हॉटेल आणि फाउंटन हॉटेल ते थेट माजिवड्यापर्यंत वाहनांच्या रांगा लागलेल्या दिसतात.

ठाणे ते फाउंटन हे १० किमी अंतर कापण्यासाठी १० ते १५ मिनिटांचा वेळ लागणे अपेक्षित आहे; मात्र त्यासाठी वाहनचालकांना तास दीड तासांचा अवधी लागत आहे. ठाणे महापालिकेच्या हद्दीत दोन्ही बाजूने गायमुख घाटापर्यंत घोडबंदर रस्त्याचे सहा-सहा पदरी मार्गात रूपांतर झाले आहे. येथील सेवारस्तेदेखील मुख्य मार्गात समाविष्ट करण्याचे काम सुरू असल्याने येथील कोंडी फुटण्यास मदत होत आहे; मात्र गायमुख घाटाच्या माथ्यापुढील रस्ता ठाणेकरांची डोकेदुखी वाढवणारा ठरत आहे. याबाबत ठाणे महापालिका आयुक्तांनी नुकतीच एक बैठक घेत फाउंटन हॉटेलकडून गायब घाटापर्यंत येणारा रस्ता रॅपिड हार्डनिंग काँक्रीटचा प्रयोग करून तत्काळ काम सुरू करावे, असे निर्देश मिरा-भाईंदर महापालिका आयुक्तांना दिले आहेत.

ठाणेकरांवर कोंडीचा ताण
काँक्रीट कमीत कमी वेळात एकजीव होते. त्यामुळे रस्ता बंद न करता दुरुस्ती करणे शक्य होते. नागरिकांना घाट रस्त्याच्या स्थितीमुळे खूप मनस्ताप सहन करावा लागत आहे. हा प्रयोग यशस्वी झाला, तर घाट परिसर लगेच त्याच पद्धतीने दुरुस्त करून वाहतूक सुरळीत होण्यास मदत होईल, असेही आयुक्त राव यांनी स्पष्ट केले होते, मात्र मिरा-भाईंदर महापालिकेकडून अद्याप कामाला सुरुवात झालेली नाही. त्यामुळे वाहतूक कोंडीचा ताण ठाणेकरांवर पडत आहे.

फाउंटन हॉटेल ते गायमुख घाट या ठाण्याच्या दिशेने येणाऱ्या रस्त्याची स्थिती अतिशय बिकट आहे. त्यावर खडी टाकून, डांबराने ग्राऊटिंग केल्यावरही हा रस्ता वारंवार उखडला जात आहे. त्यामुळे या पट्ट्यात सर्व प्रकारच्या वाहनांची वाहतूक मंदावते. वाहने उलट्या दिशेने येऊ लागतात. गर्दीच्या वेळी येथील वाहतूक कोंडीचा परिणाम मुंबई-अहमदाबाद रोडवर चिंचोटीपर्यंत जाणवतो. तसेच मिरा रोडपर्यंतही वाहनांचा खोळंबा होतो. या मार्गावरील धीम्या वाहतुकीचा परिणाम घोडबंदर मार्गावरही होतो.
- पंकज शिरसाट, वाहतूक पोलिस उपायुक्त, ठाणे

फोटो : गायमुख घाटमाथ्यावर रस्त्याची दुरवस्था झाल्याने घोडबंदर मार्गावर वाहतूक कोंडी होत आहे.