झाड पडल्याने वाहनाचे नुकसान
सकाळ वृत्तसेवा
ठाणे, ता. २७ : वर्तकनगर परिसरातील पोखरण रोड क्रमांक १ या ठिकाणी पार्क केलेल्या एका चारचाकी वाहनावर झाड पडल्याची घटना रविवारी (ता. २७) सकाळी पावणेबाराच्या सुमारास घडली. यामध्ये झाडाच्या फांद्या बाजूला असलेल्या सर्व्हिस सेंटरवर गेल्याने त्या सेंटरच्या छताचे पत्रे फुटले, तसेच वाहनाचे किरकोळ नुकसान झाले आहे. वर्तकनगर पोखरण रोड क्रमांक १ येथे परफेक्ट टच ऑटोमोबाईल सर्व्हिस सेंटर आहे. त्याच्याजवळील रस्त्यावर चारचाकी गाडी उभी केली होती. त्या गाडीवर झाड पडल्याची माहिती मिळताच घटनास्थळी अग्निशमन दल आणि आपत्ती व्यवस्थापन कक्षाच्या कर्मचाऱ्यांनी धाव घेतली. तातडीने पडलेले झाड कापून एका बाजूला करण्यात आले. या घटनेत गाडीसह त्या सर्व्हिस सेंटरचे किरकोळ नुकसान झाले आहे, तर सुदैवाने या घटनेत कोणालाही दुखापत झाली नसल्याची माहिती पालिकेच्या आपत्ती व्यवस्थापन अधिकाऱ्यांनी दिली.