सागरी सुरक्षा जनजागृतीसाठी मॅरेथॉन स्पर्धा
२५० स्पर्धकांचा उत्स्फूर्त सहभाग; हेल्पलाइन क्रमांक १०९३ चा प्रचार
उरण, ता. २७ (वार्ताहर) ः न्हावा-शेवा पोलिस ठाणे व पाणजे, डोंगरी येथील सागर रक्षक दलाच्या संयुक्त विद्यमाने सागरी सुरक्षा हेल्पलाइन क्रमांक १०९३ च्या जनजागृतीसाठी मॅरेथॉन स्पर्धा २७ जुलै रोजी मोठ्या उत्साहात पार पडली. फुंडेगाव बसस्थानक ते पाणजे गावच्या कमानीपर्यंत झालेल्या या मॅरेथॉनमध्ये २५० हून अधिक स्पर्धकांनी सहभाग घेतला.
ही स्पर्धा न्हावा-शेवा पोलिस ठाण्याचे वरिष्ठ पोलिस निरीक्षक बी. टी. ओवे यांच्या मार्गदर्शनाखाली आयोजित करण्यात आली होती. सकाळी ७ ते ९ या वेळेत झालेल्या स्पर्धेमध्ये पोलिस अधिकारी, अंमलदार, सागरी सुरक्षा रक्षक, मच्छीमार बांधव, ज्येष्ठ नागरिक, महिला दक्षता समितीच्या सदस्या तसेच युवक-युवती यांनी सहभाग नोंदवला. स्पर्धकांनी महाराष्ट्र पोलिस दलाचे ब्रीदवाक्य व सागरी सुरक्षा हेल्पलाइन १०९३ छापील टी-शर्ट परिधान करून मॅरेथॉनद्वारे जनजागृती केली. या उपक्रमातून सागरी सुरक्षेची माहिती, आपत्कालीन मदतीसाठी वापरता येणारा हेल्पलाइन क्रमांक आणि पोलिस दलाचे प्रयत्न जनतेपर्यंत पोहोचविण्यात आले. या कार्यक्रमाला वपोनि बी. टी. ओवे, सपोनि मनोज गुंड, सपोनि गणेश पाटील, पोउपनि शांताराम लेंडे, तसेच इतर अधिकारी व अंमलदार मोठ्या संख्येने उपस्थित होते. स्थानिक ग्रामस्थ व सरपंच लखपती पाटील (पाणजे), राकेश कडू, संकेत घरत, सुजाता कडू, दिनेश कडू आदी मान्यवरांनीही सहभाग घेतला. स्पर्धेअंती विजेत्यांना उत्तेजनार्थ ट्रॉफी व पारितोषिके देण्यात आली. संपूर्ण कार्यक्रमात उत्साह, शिस्त आणि सामाजिक जाणिव पाहायला मिळाली. न्हावा-शेवा पोलिस ठाणे व सागरी सुरक्षा दलाच्या या उपक्रमाचे सर्वत्र कौतुक होत आहे.