नेतिवली कारगिल विजय दिन स्मारकाची दुरवस्था
कल्याण, दि. २७ (बातमीदार) : नेतिवली धर्मवीर संभाजी राजे चौक येथे कारगिल विजय दिनाचे प्रतीक म्हणून स्मारक उभारले होते. मात्र या स्मारकाकडे प्रशासनाचे वारंवार दुर्लक्ष होत असल्याचे समोर येत आहे. मनसेने या दुरवस्थेकडे पुन्हा लक्ष वेधले असून, कारगिल विजयदिनी स्मारक स्वच्छ करण्यात आले. उभारण्यात आलेल्या प्रतिकृतीजवळ असलेल्या दारूच्या रिकाम्या बाटल्या, सिगारेटची व गुटख्यांची पाकिटे आणि इतर कचरा हटविण्यात आला.
१९९९मध्ये लडाखमधील उत्तर कारगिल जिल्ह्यातील पर्वत शिखरांवर पाकिस्तानी सैन्याला त्यांच्या ताब्यातील स्थानांवरून हुसकावून लावल्याबद्दल व पाकिस्तानवर भारताने मिळवलेला विजय साजरा करण्यासाठी २६ जुलै रोजी भारतात कारगिल विजय दिवस साजरा केला जातो. मनसेतर्फे कल्याणच्या नेतिवली येथील स्मारकाजवळ या दिवशी शहिदांना श्रद्धांजली वाहिली जाते. दरम्यान, या स्मारक परिसरात अस्वच्छता असल्याचे निदर्शनास आल्याने मनसेने संताप व्यक्त केला. आसपासचे गर्दुल्ले या स्मारक परिसरात घाणीचे साम्राज्य निर्माण करतात. वारंवार होत असलेली दुरवस्था डोळ्याने दिसूनही त्यावर ठोस उपाययोजना का केली जात नाही, असा सवाल नागरिक विचारू लागले आहेत.