राजिप शाळा उतेखोल येथे उतेखोल केंद्रस्तरीय शिक्षण परिषद उत्साहात
माणगाव (बातमीदार) ः माणगाव पंचायत समितीअंतर्गत उतेखोल केंद्राची केंद्रस्तरीय शिक्षण परिषद बुधवार (ता. २३) रायगड जिल्हा परिषद शाळा, उतेखोल येथे पार पडली. केंद्रप्रमुख शंकर शिंदे यांच्या मार्गदर्शनाखाली ही परिषद झाली.
विकास कॉलनी शाळेच्या मुख्याध्यापिका पूर्वा येलवे यांनी इयत्ता पहिलीचा बदललेला अभ्यासक्रम आणि नावीन्यपूर्ण उपक्रम या विषयावर सविस्तर मार्गदर्शन केले. बामणोली शाळेच्या उपक्रमशील शिक्षिका वैशाली पवार यांनी गुणवत्ता मूल्यांकन आणि आश्वासन आराखडा यासंदर्भात प्रत्यक्ष माहितीपुस्तिकेसह सविस्तर मार्गदर्शन केले. उतेखोलवाडी शाळेच्या उपक्रमशील शिक्षिका स्नेहल उतेकर यांनी इयत्ता पाचवी शिष्यवृत्ती, मंथन, आरटीएस स्पर्धा परीक्षा या विषयांवर उदाहरणासह अभ्यासपूर्ण माहिती दिली आणि मार्गदर्शन केले. उतेखोल केंद्राचे प्रमुख शंकर शिंदे यांनी नवभारत साक्षरता, शिष्यवृत्ती व नवोदय परीक्षा, पायाभूत परीक्षा, विद्यार्थी सुरक्षा, निपुण भारत अभियान, विद्यार्थी अध्ययन स्तर निश्चिती, आपत्कालीन परिस्थितीत व्यवस्थापन, स्कॉपसंदर्भात माहिती, घरघर संविधान, शालेय भौतिक सुविधा, गणवेश, पाठ्यपुस्तक, विद्यार्थी प्रमोशन, आदिवासी विद्यार्थ्यांचे आधार कार्ड काढणे इत्यादी प्रशासकीय विषयांवर सखोल मार्गदर्शन केले.