रक्षाबंधनासाठी ग्रीटिंग कार्डला पुन्हा मागणी
परदेशातील भावासाठी बहिणींचा ओढा वाढला
वाशी, ता. ३० (बातमीदार) ः डिजिटल युगात ई-मेल, मेसेज आणि सोशल मीडियावरून शुभेच्छा देण्याची प्रथा रूढ झाल्याने पारंपरिक ग्रीटिंग कार्डची मागणी कमी झाली होती, मात्र रक्षाबंधनासारख्या भावनिक नात्यांच्या सणानिमित्त, या शुभेच्छा पत्रांना पुन्हा एकदा बाजारात विशेष मागणी निर्माण झाली आहे. विशेषतः परदेशात राहणाऱ्या भावांसाठी बहिणीकडून पाठवली जाणारी राखी आणि ग्रीटिंग कार्ड यांना अधिक भाव मिळत असल्याचे विक्रेत्यांचे म्हणणे आहे.
यंदा रक्षाबंधन १९ ऑगस्ट रोजी साजरा होणार आहे. डिजिटल प्लॅटफॉर्मवरून पाठवलेल्या शुभेच्छांपेक्षा हाताने लिहिलेल्या शुभेच्छांचे मोल अधिक असल्याचा अनुभव ग्राहक शेअर करत आहेत. याच भावनेतून अनेक बहिणी आपल्या भावासाठी खास ग्रीटिंग कार्ड्स खरेदी करत असून, रक्षाबंधनाच्या एक-दोन महिने आधीच काही दुकानांमध्ये विचारणा सुरू झाल्याचे सांगण्यात येत आहे. बाजारात सध्या विशेष रक्षाबंधन थीमवर आधारित ग्रीटिंग कार्ड उपलब्ध असून, भावस्पर्शी संदेशांनी सजलेली कार्ड ग्राहकांच्या विशेष पसंतीस उतरली आहेत. काही कार्डमध्ये लहान गिफ्ट्स, राखी, औक्षणासाठी लागणारे तांदूळ-कुंकू, तसेच छायाचित्र लावण्याची सुविधाही दिली जात आहे.
...............
गिफ्ट शॉप्ससह ऑनलाइन प्लॅटफॉर्मवरही ग्रीटिंग कार्डसाठी मागणी वाढत आहे. पूर्वी दिवाळी, नूतन वर्ष किंवा वाढदिवसाला कार्ड घेतले जात असत, पण सध्या रक्षाबंधनासाठी अधिक मागणी आहे. ५० रुपयांपासून ते ३५० रुपयांपर्यंत मराठी आणि इंग्रजी भाषेत आकर्षक ग्रीटिंग कार्ड बाजारात उपलब्ध आहेत, अशी माहिती विक्रेते हुनेद इब्राहिम यांनी दिली. यंदा रक्षाबंधन १९ ऑगस्ट रोजी साजरा होणार असल्याने आगामी काही दिवसांत ग्रीटिंग कार्ड आणि राख्यांची खरेदी अधिक गती घेणार आहे, असा अंदाज व्यावसायिकांनी व्यक्त केला आहे. डिजिटल युगातही मानवी भावनांचा असा हस्तलिखित स्पर्श जपणारी परंपरा पुन्हा नव्याने बहरताना दिसत आहे.