जुईनगरमध्ये खड्ड्यांवर मलमपट्टी सुरू
जुईनगर, ता. ३१ (बातमीदार) : मे महिन्यापासून पावसाच्या थैमानाने नवी मुंबईत खड्डे पडले होते. काही ठिकाणी तर रस्त्यात खड्डा की खड्ड्यात रस्ता हेदेखील सांगता येणे कठीण झाले होते, मात्र बुधवार (ता. ३०)पासून पावसाने उसंत घेतल्याने पालिकेच्या अभियंता विभागाने रस्त्यांच्या मलमपट्टीला सुरुवात केली आहे. नेरूळ सेक्टर-२ ते जुईनगर परिसरात सकाळपासूनच खड्डे बुजवणे सुरू असल्याने नागरिकांनी समाधान व्यक्त केले.
गेली दोन महिने नेरूळसह जुईनगर परिसरात रस्त्यारस्त्यांवर खड्डे पडल्याने वाहनचालकांसह नागरिक त्रस्त झाल्याचे पाहायला मिळाले, मात्र पलिकेमार्फत जुईनगर येथील चिंचोली तलाव ते रेल्वे पटरीपर्यंत रस्त्याचे खड्डे बुजवण्याचे काम हाती घेतल्याचे संबंधित कर्मचाऱ्यांकडून सांगण्यात आले. त्यामुळे जुईनगर खड्डेमुक्त होणार असल्याचे दिसत आहेत, तर नेरूळ येथील सेक्टर-१० आणि नेरूळ गाव यांच्यामधील रस्ता हा नेरूळ पश्चिम परिसरातील प्रमुख रस्ता आहे. शिवाय गेली अनेक दिवसांपासून या रस्त्याच्या दुरुस्तीची मागणी नेरूळ ग्रामस्थ करत आहेत. त्यामुळे इतरत्र रस्त्यांची मलमपट्टी सुरू असताना या रस्त्याकडे पालिका दुर्लक्ष करत असल्याने नेरूळ ग्रामस्थांनी नाराजी व्यक्त केली आहे. नेरूळ गावच्या उत्तरेकडील वेशीवरच खड्ड्यांचे साम्राज्य असून, अनेक ग्रामस्थांना या रस्त्याने गावात ये-जा करावी लागते. त्यामुळे या ठिकाणीचे खड्डे कधी बुजणार याकडे नागरिकांचे लक्ष लागून राहिले आहे.