कुंडलिका नदीच्या पुलावर जीवघेणे खड्डे
रोहा, ता.२ (बातमीदार) ः मुंबई-गोवा महामार्गावरील कोलाड परिसरातील कुंडलिका नदीच्या पुलावर मोठे खड्डे पडले आहेत. या खड्डयांमुळे मार्गावरून प्रवास करणेही मुश्कील झाले असून विद्यार्थ्यांसहित वाहनचालक, नागरिकांच्या जीवाला धोका निर्माण झाला आहे.
मुंबई-गोवा महामार्गांवरील कोलाड परिसरातील कुंडलिका नदीवरील पुलाचे काम चार ते पाच वर्षांपूर्वी पूर्ण झाले आहे. परंतु, पुलावर केलेले डांबरीकरणाचे काम अत्यंत निकृष्ट दर्जाचे आहे. पाऊस पडला की दरवर्षी या पुलावर तलावाचे स्वरूप प्राप्त होते. रस्त्यावरील पावसाचे पाणी खाली जाण्यासाठी लावलेले पाईप नियोजित ठिकाणापासून वर असल्याने पाण्याचा निचरा होत नाही. यामुळे पुलावर खड्डयांचे साम्राज्य पसरले असून यातून मार्ग काढताना वाहन चालकांची तारांबळ उडत आहे. तर, दुसरीकडे या खड्ड्यातून मार्ग काढताना अपघात होण्याची शक्यता नाकारता येत नाही. या महामार्गालगत गोवे येथे गीता द. तटकरे कॉलेज असून शेकडो विद्यार्थी या मार्गावरून प्रवास करत असतात. पावसाळ्यात कुंडलिका पुलावर साचलेले पाणी मोठ्या वाहनामुळे विद्यार्थ्यांच्या अंगावर उडते. यामुळे विद्यार्थ्यांची मोठी गैरसोय होते. त्यामुळे संबधित प्रशासनाने हे खड्डे तातडीने बुजवावे, अशी मागणी नागरिकांकडून होत आहे.

फोटो कॅप्शन :
रोहा ः मुंबई-गोवा महामार्गावरील कुंडलिका नदीच्या पुलावर खड्डे पडले आहे.