भिवंडी, ता. २ (वार्ताहर) : जागतिक काविळ दिनानिमित्त स्व. इंदिरा गांधी स्मृती उपजिल्हा रुग्णालयात २२ ते २८ जुलैदरम्यान काविळ तपासणी सप्ताह राबवण्यात आला. हिपॅटायटिस बी व सी या काविळीच्या प्रकारांची वेळीच तपासणी होऊन निदान व्हावे, तसेच प्रसार रोखण्यासाठी जनजागृती व्हावी या उद्देशाने हा उपक्रम राबवण्यात आला. सप्ताहात एकूण ७८० नागरिकांची मोफत रक्त तपासणी करण्यात आली.
हिपॅटायटिस बी आणि सी या संसर्गजन्य प्रकारांबाबत नागरिकांनी जागरूक राहणे आवश्यक असल्याचे मत वैद्यकीय अधीक्षिका डॉ. माधवी पंदारे यांनी व्यक्त केले. त्यांनी सांगितले की, संक्रमित रक्त, दूषित सुईंचा वापर, असुरक्षित लैंगिक संबंध, तसेच बाधित मातेपासून बाळाला होणारा प्रसार यामुळे हिपॅटायटिसचा धोका वाढतो. त्यामुळे सुरक्षित जीवनशैली, स्वच्छता आणि तपासणी ही अत्यावश्यक बाब आहे. डॉ. पंदारे यांनी पुढे सांगितले की, अयोग्य टॅटू काढण्याची पद्धत टाळावी, सुरक्षित संबंध ठेवावेत, तसेच गर्भवती महिलांनी अनिवार्य हिपॅटायटिस बी आणि सीची तपासणी करून घ्यावी.
तपासणी मोहीमेला यशस्वी करण्यासाठी प्रयोगशाळा वैज्ञानिक अधिकारी देवीदास शेटगे, राजेंद्र शिंदे, अनिल वाघ, समीक्षा गायकवाड यांच्यासह संपूर्ण प्रयोगशाळा विभागाने विशेष मेहनत घेतली. त्यांनी नागरिकांचे समुपदेशन करत रक्तनमुने घेतले व माहितीपर मार्गदर्शन केले.

रक्तनमुने महालॅबकडे
सप्ताहाच्या रक्त तपासणी उपक्रमात गर्भवती माता, आर्ट रुग्ण आणि इतर सर्वसामान्य नागरिकांचा समावेश होता. तपासणीदरम्यान सात रुग्ण हिपॅटायटिस बी आणि तीन रुग्ण हिपॅटायटिस सी बाधित असल्याचे आढळले. संबंधित रुग्णांचे पुढील उपचारासाठी रक्तनमुने महालॅबकडे पाठवण्यात आले आहेत.