अंत्यविधीसाठी जाणाऱ्या रस्‍त्‍याची दुरवस्‍था
खासगी कंपनीच्या मनमानीविरोधात ग्रामस्थ संतप्त
उरण, ता. ४ (वार्ताहर) : चाणजे ग्रुप ग्रामपंचायत हद्दीतील स्मशानभूमीकडे जाणारा रस्ता एका खासगी कंपनीने कोणतीही पूर्वसूचना न देता उखडून टाकला आहे. त्यामुळे गावकऱ्यांना मृतदेह अंत्यविधीसाठी नेताना भरपावसात चिखल-मातीच्या मार्गातून संघर्ष करत नेण्याची वेळ आली आहे. या गंभीर प्रकारामुळे ग्रामस्थांमध्ये तीव्र संतापाची लाट उसळली आहे.
सध्या या खासगी कंपनीकडून रेवस-करंजा सागरी उड्डाण पुलाचे काम सुरू आहे. हे काम चाणजे, करंजापाडा, नागपाडा, बोबडीपाडा परिसरात मोठ्या प्रमाणावर होत असून त्याचा प्रत्यक्ष फटका स्थानिक ग्रामस्थांना बसत आहे. विशेषतः समुद्रकिनाऱ्यावर असलेल्या स्मशानभूमीकडे जाणारा पारंपरिक रस्ता कंपनीने कोणतीही पूर्वकल्पना न देता उखडून टाकला. परिणामी, गावकरी व नातेवाईकांना अंत्यविधीसाठी चिखलातून मार्ग काढत मृतदेह नेण्याची दुर्दैवी वेळ आली. या प्रकरणामुळे गावकऱ्यांमध्ये रोष निर्माण झाला असून कंपनीच्या बेजबाबदार कारभारावर अनेकांनी प्रश्न उपस्थित केले आहेत. सामाजिक कार्यकर्ते सचिन डाऊर यांनी यावर तीव्र शब्दांत टीका करताना सांगितले की, ही कंपनी स्थानिक ग्रामस्थ, शेतकरी, कोळी बांधवांना विश्वासात न घेता मनमानीने काम करत आहे. ''हम करो सो कायदा'' अशी वृत्ती त्यांनी घेतली असून हे माणुसकीला काळिमा फासणारे कृत्य आहे. जर हे थांबवले नाही, तर ग्रामस्थांचा उद्रेक अटळ आहे. या परिस्थितीवर तातडीने उपाययोजना न झाल्यास ग्रामस्थ आंदोलनाच्या तयारीत आहेत.