मनोर, ता. ५ (बातमीदार) : मुंबई-अहमदाबाद महामार्गावरील ढेकाळे गावात झालेल्या भीषण अपघातात टेम्पोचालकाचा मृत्यू, तर क्लीनर गंभीर जखमी झाला आहे. मंगळवारी (ता. ५) सकाळी साडेदहा वाजण्याच्या सुमारास अपघात झाला होता.

मुंबईच्या दिशेने जात टेम्पोचालक मंजूनाथ रुद्रप्पा नंदी याचे वाघोबा खिंडीत वाहनावरील नियंत्रण सुटल्याने भरधाव वेगातील टेम्पो महामार्गावर उभ्या कंटेनरला धडकून अपघात झाला होता. या दुर्घटनेत केबिनचा चक्काचूर होऊन टेम्पोच्या चालकाचा मृत्यू होऊन केबिनमध्येच अडकून पडला होता. घटनास्थळी दाखल झालेल्या महामार्ग सुरक्षा पोलिसांनी क्रेन, रुग्णवाहिका चालक अकील सय्यद आणि स्थानिकांच्या मदतीने चालकाचा मृतदेह केबिनमधून बाहेर काढला. टेम्पोचालकाचा मृतदेह शवविच्छेदनासाठी मनोर ग्रामीण रुग्णालयात नेण्यात आला आहे. जखमी क्लीनर शिवानंद अशोक अंकलीन याला उपचारासाठी खासगी रुग्णालयात दाखल करण्यात आले आहे. अपघातामुळे महामार्गावर वाहतूक कोंडी झाली होती. अपघातग्रस्त टेम्पो महामार्गावरून हटवल्यानंतर तासाभराने वाहतूक पूर्ववत करण्यात महामार्ग सुरक्षा पोलिसांना यश आले.