नमो ग्रँड सेंट्रल पार्कला आंतरराष्ट्रीय मान्यता
डीएनए पॅरिस डिझाईन पुरस्कार
सकाळ वृत्तसेवा
ठाणे, ता. ५ ः नवीन ठाण्याची ठळक ओळख बनलेल्या आणि ठाणेकरांसह पर्यटकांना भुरळ घालणाऱ्या नमो ग्रँड सेंट्रल पार्क आता आंतरराष्ट्रीय पातळीवरही झळकले आहे. या सेंट्रल पार्कला लँडस्केप डिझाईन-पार्क आणि सार्वजनिक जागा, शैक्षणिक, समुदाय आणि मनोरंजन सुविधा या श्रेणीमध्ये प्रतिष्ठित डीएनए पॅरिस डिझाइन पुरस्कार २०२५ ने सन्मानित करण्यात आले आहे.
ठाणे महापालिकेच्या दृष्टीकोनातून साकारलेले आणि कल्पतरू लिमिटेडने २५ एकर क्षेत्रात विकसित केलेल्या नमो ग्रँड सेंट्रल पार्क या उद्यानात भारतातील सर्वात मोठे स्केट पार्क, तीन एकरचे कृत्रिम तलाव, फिटनेस, विश्रांती क्षेत्र, अँफीथिएटर, उंच पूल आणि तीन आणि ५०० हून अधिक वृक्षसंपदा आहे. यामुळे ठाण्याच्या पर्यावरणासाठी महत्त्वपूर्ण ऑक्सिजन झोन तयार होतो. हे पार्क मुंबई आणि परिसरासाठी पर्यटनाचे उत्तम ठिकाण बनले आहे. रोज शेकडो पर्यटक येथे निसर्गाचा आस्वाद घेण्यासाठी भेट देतात. याची दखल आंतरराष्ट्रीय पातळीवर घेण्यात आली आहे. पॅरिसमध्ये जाहीर झालेल्या डीएनए- २०२५ पुरस्कारामध्ये आर्किटेक्चर, इंटिरिअर, लँडस्केप व शहरी नियोजन अशा विविध विभागांतील सर्वोत्तम रचनांचा गौरव केला जातो. त्यात ठाण्याच्या सेंट्रल पार्कलाही स्थान मिळाले आहे.

‘हा’ एक हिरवा वारसा
‘नमो ग्रँड सेंट्रल पार्कला डीएनए पॅरिस डिझाईन अवॉर्डसारखा आंतरराष्ट्रीय सन्मान मिळाल्याचा आम्हांला अभिमान आहे, असे कल्पतरू लिमिटेडचे व्यवस्थापकीय संचालक पराग मनोज यांनी सांगितले. हा पुरस्कार ठाणेकरांसाठी जागतिक स्तरावरील सार्वजनिक उद्यान उभारण्याच्या कल्पनेचा गौरव आहे आमच्यासाठी हे केवळ उद्यान नसून, ते भावी पिढ्यांसाठी एक हिरवा वारसा आहे, असेही पराग मनोज यांनी सांगितले.

जागतिक डंका
थायलंडमधील जागतिक स्तरावर प्रशंसित स्टुडिओ, लँडस्केप आर्किटेक्ट्स ४९ (एल४९) द्वारे डिझाइन केलेले, हे उद्यान आघाडीच्या वास्तुविशारद आणि शहरी विचारवंतांच्या आंतरराष्ट्रीय ज्युरीने निवडले आहे. नमो ग्रँड सेंट्रल पार्कची वर्ल्ड आर्किटेक्चर फेस्टिव्हल (Aइ) २०२५ साठीही निवड झाली आहे आणि येत्या नोव्हेंबरमध्ये मियामी येथे जागतिक स्तरावर त्याचे सादरीकरण होणार आहे.