भरधाव कारमध्ये स्टंटबाजी भोवली
सानपाडा पोलिसांकडून तिघांवर गुन्हा, व्हिडिओ व्हायरल
नवी मुंबई, ता.५(वार्ताहर)ः पामबीच मार्गावर भरधाव कारमध्ये स्टंटबाजी करणे तिघांना चांगलेच भोवले आहे. या प्रकरणात व्हायरल झालेल्या व्हिडीओच्या आधारे सानपाडा पोलिसांनी तिघांवर गुन्हा दाखल केला आहे.
खारघर तसेच दिवा परिसरात अशाच प्रकारच्या स्ंटटबाजीचा प्रकार समोर आला होता. त्यानंतर सोमवारी रात्री ११.३० च्या सुमारास हरी घोलपे हा तरूण वडीलांची कार घेऊन मित्रांसह पामबीच मार्गावर फेरफटका मारण्यासाठी गेला होता. सारसोळे येथून वाशीच्या दिशेने जात असताना, काव्य जोशी हा कार चालवत होता तर विनय रावल (२०) सनरुफमधून बाहेर येऊन स्टंट करत होता. तर हरी घोलपे हा कारच्या उजव्या खिडकीतून स्टंट करत होता. नवी मुंबई वाहतूक पोलिसाच्या व्हॉट्सअॅप ग्रुपवर हा प्रकार सोमवारी रात्री व्हायरल झाला. त्यानंतर सीवूड्स वाहतूक शाखेचे अंमलदार कमलाकर भुसारे यांनी कारच्या क्रमांकावरून सुभाष घोलपे यांना बोलावून घेतले. यावेळी घोलपे यानी स्टंट करणारा त्यांचा मुलगा, त्याचे दोन मित्र असल्याचे सांगितले. त्यानंतर सानपाडा पोलिस ठाण्यात तिघांविरोधात गुन्हा दाखल करण्यात आला आहे.
-----------------------------
खारघर, दिघा येथेही घटना
खारघर येथे चालत्या कारवर स्टंट केल्याप्रकरणी खारघर पोलिसांनी एका महिलेवर कारवाई केली होती. त्यानंतर रबाळे एमआयडीसी पोलिसानी दिघा परिसरात रिक्षावर स्टंट करणाऱ्या तिघा तरुणांविरुद्ध गुन्हा दाखल करुन त्याना ताब्यात घेतले होते.