टपाल विभागाचा सर्व्हर डाऊन
राख्या पाठवणाऱ्या नागरिकांच्या रांगा, महिलावर्गामध्ये नाराजी
खारघर, ता. ५ (बातमीदार) : टपाल कार्यालयातील कामकाज सुनियोजित करण्यासाठी टपाल खात्याकडून नवीन डिजिटल प्रणाली लागू केली आहे. मात्र ऐन रक्षाबंधन उत्सवात सर्व्हर डाऊन होत असल्यामुळे राख्या पाठवणाऱ्या महिलांमध्ये नाराजी पसरली आहे. तर नवीन प्रणालीमुळे कामकाज करताना अडथळा निर्माण होत असल्यामुळे टपाल कार्यालयाचे मोठ्या प्रमाणात आर्थिक नुकसान होत असल्याचे कर्मचाऱ्यांनी सांगितले.
रक्षाबंधन हा बहीण-भावाच्या अतूट नात्याचा आणि प्रेमाचा सण तीन दिवसांवर येऊन ठेपला आहे. भावाला रक्षाबंधनापूर्वी राख्या पोहोचणे आवश्यक असल्यामुळे नवी मुंबई, पनवेल परिसरातील टपाल कार्यालयांसमोर महिलांच्या रांगा लागल्या आहेत. दरम्यान, गेल्या चार दिवसांपासून सर्व्हर डाऊन असल्यामुळे नागरिकांना टपाल कार्यालयात हेलपाटे मारावे लागत आहेत. वाशी येथील टपाल कार्यालयातून मिळालेल्या माहितीनुसार, दरवर्षी रक्षाबंधनासाठी टपाल कार्यालयात योग्य ती उपाययोजना केली जात होती. यापूर्वी डिजिटल प्रणालीचे कामकाज एका एजन्सीच्या माध्यमातून केला जात होते. मात्र या एजन्सीचा ठेका संपल्याने यापुढे टपाल विभागाकडून नवीन डिजिटल प्रणाली लागू करण्यात आली आहे. मंगळवारपासून ही प्रणाली सुरू झाली आहे. मात्र सर्व्हरमध्ये अडचण निर्माण होत असल्यामुळे कर्मचाऱ्यांना नागरिकांच्या रोषाला सामोरे जावे लागत आहे.
याबाबत महिलांनी सांगितले, की शनिवारपासून हेलपाटे मारत आहे. तीन दिवसांवर रक्षाबंधन सण आला आहे. रक्षाबंधनाला भावाचे डोळे बहिणीच्या राखीकडे लागलेले असतात. टपाल कार्यालयाच्या नाकर्तेपणामुळे ही वेळ आल्याचे त्यांनी सांगितले.

कुरिअरचा व्यवसाय सध्या तेजीत
टपाल खात्याच्या ऑनलाइन प्रणालीचे सर्व्हर डाऊन असल्यामुळे नागरिक कुरिअर कार्यालयात धाव घेत आहेत. त्यामुळे कुरिअरचा व्यवसाय सध्या तेजीत सुरू असल्याचे समजले.

एक तासापासून रांगेत उभा आहे. सर्व्हर सुरळीत चालू राहिल्यास राख्या जातील, नाहीतर पुन्हा उद्या यावे लागेल.
- अमोल गायकवाड, वाशी

सर्व्हरमुळे राज्यात सर्व विभागांत ही अडचण निर्माण झाली आहे. आजपासून प्रणाली सुरू आहे. राखी वेळेत मिळावी यासाठी २४ तास काउंटर सुरू ठेवण्यात आली आहे.
- बी. व्ही. एन. सुरेश, वरिष्ठ अधीक्षक, टपाल विभाग