डिकॅथलॉनचे तीन लाख रोजगार निर्मितीचे उद्दिष्ट
मुंबई, ता. ५ : डिकॅथलॉन या जागतिक आघाडीच्या स्पोर्टस ब्रँडने नुकताच भारतातील उत्पादन प्रवासाचा रौप्यमहोत्सव साजरा केला. या वेळी २०३०पर्यंत भारतातून स्थानिक खरेदी तीन अब्ज डॉलर्सपर्यंत वाढवण्याचे धोरणात्मक ध्येय ठेवण्यात आले आहे. भारतात डिकॅथलॉन उत्पादन परिसंस्थेत प्रत्यक्ष आणि अप्रत्यक्ष स्वरूपात तीन लाखांहून अधिक नवीन रोजगाराच्या संधी निर्माण करण्यासाठी काम करीत असल्याचे डिकॅथलॉन इंडियाचे मुख्य कार्यकारी अधिकारी शंकर चॅटर्जी यांनी सांगितले.

सध्या डेकॅथलॉनच्या जागतिक खरेदीच्या प्रमाणात भारताचा वाटा आठ टक्के असून, २०३० पर्यंत तो १५ टक्क्यांपर्यंत वाढवण्याचे उद्दिष्ट आहे. ही वाढ भारतीय ग्राहकांच्या आणि जागतिक बाजारपेठांच्या वाढत्या मागण्या पूर्ण करण्यासाठी डिझाइन केलेल्या फूटवेअर, फिटनेस उपकरणे आणि टेक्निकल टेक्स्टाइल अशा प्रचंड विक्री होणाऱ्या श्रेणींमध्ये लक्ष केंद्रित करून पूर्ण केली जाईल, असे कंपनीने सांगितले.
शंकर चॅटर्जी म्हणाले, ‘मागील २५ वर्षांपासून भारतातील आमचा उत्पादन प्रवास देशातील डिकॅथलॉनच्या यशाचा कणा राहिला आहे. आमच्या स्थानिक उत्पादन परिसंस्थेची उत्तम गुणवत्ता, विश्वासार्हता आणि वेग यामुळे आम्हाला रिटेलमध्ये मोठा विस्तार करणे शक्य झाले. आम्ही भारतीय क्रीडा क्षेत्राच्या वाढत्या गरजा पूर्ण करणाऱ्या मेड इन इंडिया श्रेणींचा वैविध्यपूर्ण आणि वाढता पोर्टफोलिओ ऑफर करण्यास सक्षम आहोत. २०२५ मध्ये भारतात विकल्या जाणाऱ्या ७० टक्क्यांपेक्षा जास्त प्रमाणात उत्पादने भारतातच बनवली जात होती. २०३०पर्यंत हा आकडा ९० टक्क्यांपर्यंत वाढण्याची अपेक्षा आहे. त्यामुळे ब्रँडचे स्थानिक सोर्सिंग धोरणावर अधिक लक्ष केंद्रित केले जाईल.’ ‘भारतात उत्पादनाचा रौप्यमहोत्सव साजरा करणे हा आमच्यासाठी अभिमानाचा क्षण आहे. आमची भारतातील ५५ शहरांमध्ये १३२ स्टोअर्स आहेत. डिकॅथलॉन २०३० पर्यंत ९० हून अधिक शहरांमध्ये आपली रिटेल विक्री वाढवण्याचे उद्दिष्ट ठेवत आहे,’ असे डिकॅथलॉन इंडियाचे उत्पादन प्रमुख दीपक डिसूझा यांनी सांगितले.