‘एक धागा सैनिकांसाठी’ भगिनी समाज शाळेचा उपक्रम
पालघर, ता. ६ (बातमीदार) ः शहरातील भगिनी समाज संस्था संचालित, प्राथमिक विद्यामंदिर भगिनी समाज शाळेतील विद्यार्थ्यांनी ‘एक धागा सैनिकांसाठी’ हा उपक्रम राबविला आहे. शिक्षक दर्शन भंडारे व दिलीप देसक व मुख्याध्यापिका प्रीती वर्तक यांच्या मार्गदर्शनाखाली हा उपक्रम राबविण्यात आला.
देशाच्या विविध सीमावर्ती भागात अहोरात्र देशसेवा करणारे सैनिक रक्षाबंधन सणाच्या दिवशीसुद्धा आपले कर्तव्य बजावत असतात. त्यांचे मनोबल वाढावे, या भावनेतून भगिनी समाज शाळेतील विद्यार्थ्यांनी विविध आकाराच्या आणि रंगांच्या जवळपास २०० राख्या बनविल्या आणि सैनिकांसाठी शुभेच्छापत्रेही लिहिली. सोमवारी (ता. ४) पालघर जिल्हा पोलिस अधीक्षक कार्यालयात राख्या सुपूर्द करताना उपस्थित पोलिस अधीक्षक यतीश देशमुख, विक्रमगडचे आमदार हरिश्चंद्र भोये, भाजप नेते नंदकुमार पाटील, कृषी व पशुसंवर्धन माजी सभापती संदीप पावडे, भाजपचे सरचिटणीस समीर पाटील यांनी विद्यार्थी प्रतिनिधी स्वराली बहिर व अंतरा देशमुख यांच्याकडून राखी बांधून घेतली आणि त्यांना ओवाळणी देऊन त्यांचे अभिनंदन केले. पोलिस अधीक्षक यतीश देशमुख यांच्या मार्गदर्शनाखाली या राख्या व शुभेच्छापत्रे टपालाद्वारे लेह, लडाख येथील सैनिकांच्या विविध बटालियन असलेल्या मुख्यालयी पत्त्यावर पाठवले. प्राथमिक विद्यामंदिर भगिनी समाज शाळेने राबविलेल्या उपक्रमाचे पालकवर्गातून कौतुक होत आहे.

फोटो ः पालघर भगिनी समाज विद्या मंदिरातील विद्यार्थ्यांनी सैनिकांसाठी राख्या पाठवल्या.